Дорнод аймгийн Мэргэжлийн хяналтын газраас Орон нутгийг судлах танхимын сан хөмрөгийн улсын тооллогын явцад шалгалт хийх явцад музейн үзмэр алга болсон хэрэг гарчээ. Тодруулбал, улс, аймгийн чанартай музейн болон орон нутгийг судлах танхимын улсын тооллогоор тус аймгийн Халхгол, Булган, Цагаан-Овоо, Баяндун, Дашбалбар суманд ховор, чухал нийт 28 ширхэг үзмэр, эд өлгийн зүйлс дутаасан зөрчил илэрсэн байна. Дээрх үзмэр, эд өлгийн зүйлс нь хариуцан ажиллаж байсан албан тушаалтны ажлын хариуцлагагүй байдлын улмаас алга болсон байна.
Тухайлбал, Монгол Улсад хоёрхон ширхэг байгаа ардын жүжигчин, алдарт хуурч Жамъянгийн хэрэглэж байсан ширэн цартай морин хуур, ясан савхтай мөнгөн тоноглолтой маш хуучны хийцтэй хэт хутга, оюу, номин шигтгээтэй мөнгөн бүслүүртэй, ширэн цартай бүрэн бүтэн дамар, оюу шигтгээтэй, мөнгөн толь зэрэг ховор нандин зүйл алдагджээ. Хяналт шалгалт хийсний дараа алдагдсан зүйлийн жагсаалтыг гаргаж, аймгийн Цагдаагийн газарт шалгуулахаар шилжүүлсэн байна.
Г.Төгс
Эх сурвалж: www.mminfo.mn
