Лос-Анжелесийн цагдаа нараар наадагчид тоглоомоо зогсоохыг хүсэхгүй байгаа бололтой. Хэдэн хоногийн турш утсаар худал мэдээлэл өгөгчид 911-ийнхнийг бүр бухимдуулж орхиод байна. "Оддын хот" гэгддэг Лос-Анжелесийн цагдаагийн газар руу байсхийгээд л оддын гэрт аймшигтай хэрэг гарсан тухай дуудлага өгөх утсаар наадагчид олон болоод байна. Дөрөвдүгээр сарын 4-нд 911 рүү нэгэн этгээд бачимдсан хоолойгоор ярьж, "Селена Гомесийн эцэг нь эхийг нь буудан хөнөөж, одоо байшингаа шатаах гэж байна" гэж мэдээлжээ. Цагдаа нар хэргийн газар яаравчлан очиход Селена Гомес эцэг эхийнхээ хамт тайван сууж байж.
Хэдэн цагийн дараагаар Жастин Тимберлейкийн гэр рүү цагдаа нар яаран очихоос аргагүйд хүрчээ. Нэгэн этгээд утсаар Тимберлейкийн гэр рүү дөрвөн өнгөт арьстан эр дайран орж, хоёр ч удаа буун дуу гарсан тухай мэдээлсэн байна. Мөн тэд гарч зугтахдаа тэсрэх бөмбөг шиг зүйл үлдээснийг дуулгажээ. Цагдаа нар яаран Тимберлейкийнд очиход юу ч болоогүй л байж.Утсаар тоглогчид яах гэж одод, цагдаа нараар ийнхүү наадаад байгаа нь одоо хүртэл ойлгомжгүй байгаа гэнэ.
Эх сурвалж: new.mn
