Хүмүүний хөргийг цаасан дээр буулгах тийм ч амар биш. Тухайн хүнийхээ дүр төрхийг яг байгаагаар нь амьд мэт дүрслэхэд багагүй авьяас, ур чадвар, мэдрэмж шаарддаг нь лавтай.Үе үеийн хар зургийн мастеруудын залгамж халаа болсон нэгэн залуу авьяастныг танилцуулж байна. Манай шинэ танил Ш.Билэг Сод МУИС-ийн Мэдээлэл технологийн сургуулийн нэгдүгээр курсийн оюутан. Тэрээр өөрийн бүтээлээ фотошопоор бус өөрийн гараар зурдаг болохыг онцолж байна.
-Хар зургийг хэзээнээс сонирхсон бэ?
-Цэцэрлэгт байхаасаа л зураг сонирхдог байсан. Зурагтаар хүүхэлдэйн кино гарахаар өмнө нь дэвтэр, харандаагаа барьж суучихаад баатруудыг нь дуурайлгаж зурдаг байлаа. Энэ сонирхлоо хөгжүүлж, мэргэжлийн түвшинд зурдаг болохоор хар зургийн арга техникүүдээс суралцаж байна.
-Ур чадвараа дээшлүүлэхийн тулд юу хийж байна вэ?
-Хэдэн жилийн өмнө хар зургийн сургалтад хэд хоног хамрагдсаныг эс тооцвол ерөнхийдөө интернэтээс суралцаж байна. YouTube бол миний багш л гэсэн үг. Тэнд дэлхийн алдарт хөрөг зураачдын уран бүтээлээ туурвиж буй бичлэг болоод хар зургийн арга техник гээд бүх зүйл бий.
-Байгаль дээрх олон өнгийг хослуулан гайхалтай бүтээл туурвиж болох байтал хар зураг сонирхсон нь ямар учиртай вэ?
-Хар, цагааныг өнгөний хаан, хатан гэдэг. Хөрөг зурахад энэ хоёр өнгө их зохицдог юм. Гэхдээ саяхан өнгийн харандаагаар нэг хөрөг зурсан. Хар, цагаанаар зурахаас илүү ажиллагаатай юм билээ. Цаашид өнгөт зураг зурах санаа байгаа. Мэргэжлийн зураач биш болохоор дутагдалтай зүйл их байна.
-Хөрөг зурахдаа өөрөө ихэвчлэн нүднээс нь эхэлдэг юм билээ. Ер нь хөрөг зурахад юу нь хамгийн хэцүү байдаг вэ?
-Нүд, үс зурахад нарийн ажиллагаа ихтэй. Нүдийг нь гоё зурвал тухайн хүний төрх илүү тод гардаг. Ямар нэг зүйлийг нь бодит байдлаас өөр зурж, тэр хүнийг доромжилж болохгүй. Тиймээс нарийн ажиглалт, мэдрэмж чухал. Зарим хүн намайг photoshop ашигласан гэдэг. Тэгэхээр нь зурж байгаа бичлэгээ фэйсбүүк хуудастаа тавьсан.Түүний фэйсбүүк хуудаст маш олон хүн зургаа зуруулах хүсэлтэй байгаагаа бичсэн байсан. Фэнүүдийнхээ хүслийг хэзээ биелүүлэхийг нь түүнээс лавлахад “Нэг хөргийг 3-5 цаг зурдаг болохоор хичээлийнхээ хажуугаар тэр болгоныг зурах боломжгүй. Зурах ур чадвараа илүү дээшлүүлж байгаад цаашид зурна” гэлээ. Түүний бүтээлийг сонирхож буй хүмүүс фэйсбүүкийн Sod Depiction хуудсаар холбогдож болох аж.
П.ТУНГАЛАГ
Түүний уран бүтээлээ хэрхэн бүтээдэг болохыг та энэ бичлэгээс үзээрэй.
Түүний бүтээлүүдийг энд дарж үзнэ үү.
www.URLAG.mn
