“Академийн Дээд Шагнал гардуулах ёслол”-ын үйл ажиллагааг Монголын Үндэсний Кино Урлагийн Академиас уламжлал болгон зохион байгуулсаар ирсэн билээ. “Academy Awards 2012” ёслолын үйл ажиллагаа 2012 оны 5 дугаар сарын 12- ны өдөр УДЭТеатрт ёслол төгөлдөр болсон бөгөөд тус наадамд 15 кино 18 номинацид өрсөлдөж, шилдгийн шилдэг киногоор “WISDOM” кино продакшны бүтээл, найруулагч Ж.Сэнгэдоржийн найруулсан “Бодлын хулгайч” кино шалгарч “Гран При” шагнал хүртэж байлаа. Шилдэг найруулагчаар “DOZ” интертаймэнтийн найруулагч Доржсүрэн “Хөх толбот хүмүүс” киногоороо шалгарсан бол Монголын кино урлагт үнэтэй хувь нэмэр оруулсан уран бүтээлчээр Төрийн соёрхолт, МУ-ын Урлагийн гавьяат зүтгэлтэн кино найруулагч Б.Балжинням тодорсон юм. Мөн эрэгтэй туслах дүрийн шагналыг УДЭТ-ын жүжигчин Ц.Цэрэнболд “Богд хаан” киногоор, Шилдэг хөгжмийн зохиолоор Төрийн соёрхолт, Ардын жүжигчин, хөгжмийн зохиолч Н.Жанцанноров “Богд хаан” киногоор тус тус шагналын эзэд болж байлаа. Харин шилдэг эмэгтэй гол дүр эзэнгүй үлдсэн удаатай. Тэгвэл энэ жилийн “Academy Awards Mongolia 2013” кино наадамд шилдэг богино хэмжээний кино номинаци шинээр нэмэгдсэн бөгөөд шинэ залуу уран бүтээлчид, кино сонирхогчид өөрсдийн хийсэн богино хэмжээний киногоор Академийн дээд шагналд нэрээ дэвшүүлэх боломжтойг онцолж байгаа юм.
Шагналын хур буусан 2012 оны 05 сарын 12-ны үдшийн шилдгүүдийн сэтгэгдлийг эргэн санацгаая.
Шилдэг зохиол: Д.Төрмөнх “Бодлын хулгайч”
-“Би 10-аад жилийн өмнө Дэлхийн наадмаас ийм шагнал 23-ыг авч байлаа. Хамгийн гол нь эх орноосоо шагнал авна гэдэг сайхан санагдаж байна. Бас энэ шагнал энэ шагналуудаас хамаагүй том хүнд юм.
Шилдэг найруулагч : Ш.Доржсүрэн /СТА/ “Хөх толбот хүмүүс”
-“Юуны өмнө шилдэг найруулагчид өрсөлдсөн бүх найуулагч нарт баяр хүргэе. Хамаг зүйлийг л амжуулж өөрөө ч кинондоо тоглосон хайрт эхнэр Мөнгөнзулдаа сайн сайхныг хүсэн ерөөе. Телевиз үзэж суугаа хүү, охин хоёртоо хайртай шүү. Аав, ээж хоёр нь ийм шагнал авах гэж нойргүй явсан юм шү. Удаан орхиж явсанд уучлаарай.
Шилдэг хөрөнгө оруулагч: М.Равданжамц “Хөх толбот хүмүүс”
-“Өөрсдийн оюун ухаан, бодол, авьяас чадвараа ашиглан, хүн төрлөхтний нэгэн агуу гайхамшиг болсон кино хэмээх урлагийг бүтээдэг та бүхэндээ баярлалаа.”
Шилдэг зураглаач: Д.Ангараг “Бодлын хулгайч”
– “Их санаандгүй зүйл боллоо. Юуны өмнө энэ наадмыг зохион байгуулсан Кино Академи, “Бодлын хулгайч” кино группын хамт олондоо баярлалаа. Мөн гэр бүлийнхэн ханьдаа баярлалаа.
Шилдэг дуу: Б.Дашдондог “Хүний хүүхэд”
– “Энэ дуу 2008 оноос хойш сэтгэлд минь үргэлж явсан юм. Киноны дуу болоод энэ тайзан дээрээс шагнал авна гэж зүүдэлсэн ч үгүй явлаа. Кинондоо миний дууг тоож оруулсан найруулагч Б.Амараадаа баярлалаа.”
Шилдэг эрэгтэй гол дүр: Б.Амарсайхан /СТА/ “Бодлын хулгайч”
-“Маш олон хүнд баярлалаа гэж хэлмээр байна. Хорих ангид телевизээр үзэн суугаа хамтран тоглосон залуучууддаа бүгдэд нь баярлалаа. Мөн киног санаачилж, хийж бүтээхэд бүхий л талаараа тусласан ангийн анд, унаган багын минь найз Баясаа чамдаа маш их баярлалаа. Монголын кино урлаг мандтугай . Ура…”
Монголын кино урлагт үнэтэй хувь нэмэр оруулсан хүн: Бэгзийн Балжинням / МУ-ын Төрийн соёрхолт, МУУГЗ, кино найруулагч/
-“Ийм юм болно гэж зүүдэлсэнгүй. “Орой унтвал нэгийг үздэг, эрт босвол нэгийг сонсдог ” гэдэг шиг юм болж байна. Олон сайхан нөхөдтэй найзалж явсан учраас би энэ шагналыг гардаж авлаа. Юу ч гэсэн Монголын кино урлагийг амьсгал хураатлаа дэмжиж, зүтгэж явна гэдгээ та бүхэндээ амлая.”
Шилдэг нүүр хувиргалт: Х.Дагирмаа /СТА/, Х.Шүрэнцэцэг “Хүний хүүхэд”
“Та бүхэндээ энэ оройн мэнд хүргэе. Кино болон тайзны урлагт нүүр хувиргалт томоохон үүрэг гүйцэтгэдэг. Энэхүү хүндтэй шагналд биднийг нэр дэвшүүлсэн найруулагч Б.Амараадаа баярлалаа”
Шилдэг дууны найруулагч: Г.Баттуваан
– Юуны өмнө кино группынхээ бүх ах нар, найз нөхөд дүү нартаа баярлалаа. Энэ шагнал бид бүхний хамтын бүтээл байлаа. Намайг тусалж дэмждэг бүх хүмүүст баярлалаа.
Ийнхүү гурав дах жилдээ зохион байгуулагдаж буй “Academy Awards Mongolia 2013” кино наадмын шагналын эзэд хэн байх бол …
Та бүхнийг урлагийн тэнгэр ивээг…
www.URLAG.mn
