Франкфуртын их сургуулийн эрдэмтэд ирэх оны Нобелийн шагналыг авах нь тодорхой болсон тухай Германы хэвлэл мэдээллийн хэрэгслүүдээр шуугиж эхэлжээ. Учир нь тэдгээр эрдэмтэд алмаз, маргад эрдэнийг үйлдвэрлэж болдогийг батлаж шуугиант нээлт хийсэн байна. Гэхдээ тус нээлтийг хийсэн эрдэмтдийн багийг ахалж, гардан хийсэн эрдэмтэн нь доктор Баяржаргалын Лхамсүрэн юм байна. Эрдэм шинжилгээний түвшинд алмазыг хиймэл аргаар буюу шохойн чулуунаас гарган авч болохыг тэрээр баталжээ. Энэ нь тун энгийн арга бөгөөд үүгээр хүссэн хэмжээнийхээ алмазыг гарган авч болох аж. Уг нээлтийг хийсний дараагаар бүх л эмэгтэйчүүд Б.Лхамсүрэн шиг залууг мөрөөдөж байна гэсэн хөгжөөнт яриа хүртэл Германд гарчээ. Германыг бүхэлд нь шуугиулж тун удахгүй дэлхий нийтийг байлдан дагуулах энэ нээлтийг хийсэн 38 настай залуу монгол эрдэмтэн олон жилийн турш хийсэн судалгаа шинжилгээнийхээ ажлыг амжилттай дуусгасандаа ихэд сэтгэл хангалуун байгаа ажээ.Дашрамд дурьдахад алмаз бол хамгийн үнэтэй, байгалийн шинж чанараараа хамгийн хатуу чулуу хэмээгддэг. Үүнийг хиймэл аргаар хийхийн тулд дэлхийн эрдэмтэд сүүлийн 60 жил уйгагүй, идэвхтэй ажиллаж байгаа ч монгол хүний оюун ухаан түрүүлж чаджээ.
www.URLAG.mn
