“Алтан хальс” холбоо “Dreamers" Day” буюу үнэ цэнэтэй, ховор нандин, урлагийн бүтээл болсон арт кинонуудыг үнэ төлбөргүйгээр Монгол хадмал орчуулгатайгаар чанарын өндөр түвшинд үзэгчдэд хүргэж байгаа билээ. Тэд энэ сарын 20-нд 14.00 цагт Хаан банкны төв байранд байрлах “Red ger” арт галерейд "Берлин: их хотын симфони", "Камертай хүн" кинонуудыг үзэгчдэд хүргэхээр зэхжээ.
“Хотын симфони” хэмээх бие даасан төрөл жанр 1920-иод онд хүчээ авч байв. Уг төрлийн киноноос хамгийн алдартай киноны нэг нь "Берлин: их хотын симфони" байлаа. Руттманны өмнөх абсолют кинонуудаас эрс өөр энэ киног хийх санааг Дзига Вертовийн бүтээлүүд өдөж өгчээ. Вертовт ч мөн Руттманны бүтээлүүд нөлөөлж, бие биенээ өрдөж байсан түүхтэй. Тиймдээ ч Вертов алдарт "Камертай хүн" киногоо уг киноны дараа хийсэн юм. Эксперименталь баримтат уг бүтээл нь баримтат киноны эцэг, кино онолч Дзига Вертов 1929 онд хийсэн бөгөөд кинондоо зураг авалтын олон шинэлэг шийдлүүдийг гаргаж энэ нь цаашлаад хойчийн кино бүтээгчидэд гарын авлага болсон юм. Кино дуугүй бөгөөд үүрийн гэгээнээс үдшийн бүрэнхий хүртэл Москва, Киев, Одесса хотуудаар зураг авалтууд хийгддэг.
www.URLAG.mn
