Роттердамын Кунстхаллын музейгээс алдагдсан уран зурагнуудыг уг хэрэгт шалгагдаж байгаа сэжигтний ээж нь шатаасан гэж мэдүүлжээ. Румыний хууль сахиулах байгууллагаас эх сурвалж аван Ассошиэтэд Пресс агентлаг өчигдөр энэ талаар мэдээлсэн байна.
Кунстхалл музейд өнгөрсөн оны аравдугаар сарын 16-ны өдөр хулгай орж, долоон ширхэг уран зураг алдагдсан билээ. Уг зураг дотор Пикассо, Гоген, Матисс, Люсьен Фрейд, Мейер де Хаан нарын тус бүр нэг, Клод Монегийн хоёр бүтээл байсан юм.
Румыний хууль сахиулах байгууллага уг хэрэгт сэжиглэн Рад Догар гэгчийг энэ оны нэгдүгээр сард баривчилжээ. Хүүгээ баригдмагц эх Ольга Догар нь хүүдээ гай болж магадгүй гэж үзсэн баримтыг шатаая гэж сэтгэн уран зурагнуудыг шатаасан байна. Тэрбээр 100-200 сая ам.доллараар үнэлэгдэх асар үнэтэй урлагийн бүтээлүүдийг гэрийнхээ зууханд хийн шатааж орхижээ. Румыний Прокурорын газрын мэдээлснээр, одоо тусгай шинжээчид Ольга Догарын гэрийн зуухнаас олдсон үнс, хөөг шинжилж байгаа юм байна.
Музей ухсан хэрэгт хэд, хэдэн хүнийг сэжиглэн шалгаж байгаа бөгөөд тэдний нэг нь ч хэргээ хүлээгээгүй байгаа юм.
Х.Сайхан
Эх сурвалж: www.mminfo.mn
