“Номтой нөхөрлөе клуб” энэ сараас эхлэн Монголын хойч ирээдүй болсон залуус, хүүхэд багачуудын оюунд зохих хувь нэмэр оруулах үүднээс “21 аймаг 21000 ном” хэмээн төслийг эхлүүлээд байгаа аж.
Тус төрийн бус байгууллага нь уг төслийн хүрээнд аймгийн номын сан болон сургуулиудад олон төрлийн 1000 гаруй номыг хандивлахаар төлөвлөжээ. Одоогийн байдлаар уран зохиол, шүлэг яруу найраг, хувь хүний хөгжилийн гэх мэт төрөл бүрийн сүүлийн үеийн чухал хэрэгцээтэй 900 гаруй ном цуглараад байгаа гэнэ.
Энэхүү төсөл нь Хөвсгөл аймгаас хэрэгжиж эхлэх бөгөөд энэ долоо хоногт багтаж цуглуулсан номнуудаа хүргүүлэхээр зэхэж байна. Цаашид эл арга хэмжээ үргэлжилж бусад аймагт хэрэгжинэ.
Иймээс “Номтой нөхөрлөе клуб”-ийнхэн тухайн орон нутагт төрж, өссөн хүмүүст хандан дэмжиж ажиллахыг уриалж байгаа аж. Мөн “21 аймаг 21000 ном” төслийг “Facebook”, “Twitter” гэх мэт олон нийтийн сайтаар дамжуулан олж мэдсэн хүмүүс гэртээ байгаа илүү номоо хандивлах байна.
Тус клуб нь өнгөрсөн оны 10 сарын 7-нд байгуулагдсан. Ахархан хугацаанд нэлээд олон сайн үйлсийн аян өрнүүлсэн байна. Тухайлбал, шинэ оноо эмнэлэгт угтаж буй хүүхдүүдэд зориулж “Шинэ жилийн Шидэт ном” хэмээх уриан дор 1200 гаруй ном, Олон улсын эмэгтэйчүүдийн эрхийн өдөр Хорих 407 дугаар ангид эрхээ хасуулсан эмэгтэйчүүдэд 600 ном, төдийн тооны сарнай бэлэглэжээ. Хамгийн сүүлд тэд Эх үрсийн баярыг тохиолдуулан өнгөрсөн сарын 2-нд Хорих 411 дүгээр ангид хүмүүжиж буй хүүхдүүдэд 600 ном, оньсон тоглоом, рубик шоо бэлэглэсэн байна.
www.URLAG.mn
