“Мөрөөдлийн театр”-ын уран бүтээлчид тайзны найм дахь бүтээл болох “Гээсэн хайраа аваарай” тун удахгүй шоу драмаа үзэгчдийн хүртээл болгох гэж байна. Шоу драмыг энэ сарын 10-наас эхлэн Тусгаар тогтнолын ордонд өдөр бүр 19.00 цагаас тоглоно.
Тоглолт үндсэн гурван хэсгээс бүрдэх бөгөөд эхний хэсэгт Оросын зохиолч Глобины “Хонгорхон ижий минь” зохиолоос сэдэвлэсэн нэг цагийн хугацаатай жүжгийг тоглох юм. Харин үлдсэн хоёр нь тус бүр 30 минутын хошин шогийн номер гэнэ.
Энэ тоглолтын талаар тус театрын жүжигчин, МУСТА Г.Алтаншагайгаас тодруулахад “Тоглолтын эхлэл маш сонирхолтой болно. Учир нь урьд хэзээ ч, аль ч тоглолтод тавигдаж байгаагүй элементүүдийг бодож олсон юм. Мөн ямар ч тоглолтын үеэр харагдаж байгаагүй сюрпризийг бас бэлдсэн байгаа. Энэ удаагийн тоглолтын тайз, хувцас гээд бүх зүйл дээр дэвшилтэт технологи ашигласан. Гэрэл аппаратур бас сүүлийн үед залуусыг байлдан дагуулж байгаа лазер шоу гээд энэ бүгдийг хослуулсан шоуг хийхээр бэлдэж байгаа. Нэг л сюрпризийг задлахад яг тайзан дээр Монголын уран сайхны кинонуудын төгсгөлийн хэсгийг өөрчилж энэ кино ингэж төгссөн бол гэсэн уран фантаазыг бий болгож аз жаргалтайгаар төгсгөж байгаа” гэжээ.
Энэ удаагийн шоу тоглолтонд “Мөрөөдлийн теат”-рын жүжигчид бүрэн бүрэлдэхүүнээрээ тоглож байгаа бөгөөд нийт 40 гаруй хүний бүрэлдэхүүнтэй тоглох аж. Мөн тус шоу драмын ерөнхий найруулагчаар СТА, бүжиг дэглээч Г.Ган-Очир ажиллаж байгаа бол тайз заслыг зураач н.Баярмагнай хийж байгаа юм.
“Гээсэн хайраа аваарай” шоу драм нь өөрийн гэсэн дуутай бөгөөд дууг нь Алтаншагай, Батаа, Эрхэмээ гурав хамтран дуулсан байна. Тэд энэ дуугаа тоглолтынхоо нэрээр нэрлэсэн бөгөөд нээлтийн өдөр тайзан дээр дуулна гэдгээ ч хэлээд авчээ. Харин энэ дууныхаа клипыг тоглолтынхоо дараа хийхээр болсон байна.
Дашрамд сонирхуулахад Мөрөөдлийн театрынхан дэлгэцийн хоёр дахь уран бүтээлийнхээ зохиол дээр ажиллаж эхэлжээ. Тэд кинондоо хараахан нэр өгч амьжаагүй байгаа гэнэ.
www.URLAG.mn
