Хүн байгаль дэлхийтэйгээ зүй зохисгүй харилцаж, ёс заншил, өв уламжлалаа умартсанаас үүсч болох эмгэнэл, эрсдэлийн талаар сонирхолтой байдлаар өгүүлсэн “Тоглоомын дүрэм” олон ангит уран сайхны кино NTV телевизээр есдүгээр сарын 30-наас гарч эхлэх гэж байна.
Тус бүтээлийг NTV телевизийн кино, сериал, теле жүжиг, зохиомжид гаршсан туршлагатай хамт олон үзэгчдэдээ өргөн барьж байгаа юм. Найруулагчаар МУСТА Д.Цогт ажиллаж, гол дүрд МУСТА Ж.Пүрэвдорж, Ч.Болд, жүжигчин Б.Батсумъяа, Б.Батболд, Ш.Батболд, Б.Азжаргал, Т.Бадамжав нар тогложээ. “Тоглоомын дүрэм” олон ангит кино сар гаруй үргэлжлэнэ.
Зохиолын товч агуулга: Эзэнгүй хөвч дэх нууц шүтээнд мөргөхөөр найман хүнтэй аялалын баг замд гарна. Гэвч, хүн амьтангүй зэлүүд хөвчид тэдний машин эвдэрч, жолооч нь тусламж дуудахаар буцсан боловч эргэж ирсэнгүй. Үлдсэн долоон зорчигч хоол хүнс, ус түлээний асуудалтай нүүр тулгарна. Эрс тэс ааш араншинтай тэдгээр хүмүүстэй хамт та ч бас явсан бол амьд үлдэхийн төлөө бүтэн 20 хоног хэрхэн тэмцэх байсан бол?
Найруулагч Д.Цогт: “Тус кино нь байгалийн тайлагдашгүй хүчний өмнө хүн гэгч амьтан дэндүү өчүүхэн бөгөөд байгаль дэлхийгээсээ холдох тусам хүн төрөлхтний мөхлийн цаг ойртоно гэсэн үндсэн санааг агуулж буй. “Тоглоомын дүрэм”-ийн бүх үйл явдал эзэнгүй уул тайгад өрнөдөг. Манай бараг бүх сувгаар солонгосын олон ангит сериал гарч байна. Үүний оронд үндэсний сериал олон гараасай гэдэг үүднээс, мөн, олон хоног төөрч, үхэл амьдралын зааг дээр ирж буй хүмүүс тулгарсан бэрхшээлийг хэрхэн даван туулж буй талаар зөвхөн нэг ангид багтаан үзүүлэх нь хэцүү учраас олон ангит кино хийхээр шийдсэн. Өнөөдөр алт эрдэнэс, эд баялагт нь шунан газрын хэвлийг төнхөж, ой хөвчийг тайрч буй хүмүүсээс байгаль дэлхий ямар нэг байдлаар хариугаа авна гэдгийг бүгд мэддэг ч тоодоггүй. Хогоо хүртэл хамаад нүүдэг монгол зан заншил маань устах дээрээ тулаад байна. Байгалийн хэмжээлшгүй хүчний өмнө баян ядуу, дарга сайд, хэн байхаас үл хамааран бүгд өчүүхэн гэдгийг бид киногоороо ойлгуулахыг зорьсон” гэжээ.
www.URLAG.mn
