Цэргийн Дуу Бүжгийн Эрдмийн Чуулгын гоцлол дуучин Б.Энхбат "Сэтгэлд шингэсэн хайр" нэртэй тоглолтоо 2013 оны 11-р сарын 18-нд Монгол Бөхийн өргөөнд 19 цагаас ганцхан удаа хийх гэж байна.
Тэрээр 2011 онд "Наран зүрх" хэмээх цомгоо ард түмэндээ өргөн барьж байсан. Түүний сүүлийн үед ард түмний дунд ихээр дуулагдах болсон "Сэтгэлд шингэсэн хайр" хэмээх шинэ уран бүтээл нь Ойрад монголын залуу дуучны дуулсан "Шархадсан сэтгэл" хэмээх дууны Ар монгол дахь хувилбар юм. Элэг нэгт ахан дүүсийнхээ дууг өөрийн болгож дуулсан чадварлаг дуучнаар тодорч, "Чадаж байгаа юманд арга байхгүй" хэмээн уран бүтээлчид дундаа яригдах болсон залуу дуучин маань анхныхаа бие даасан тоглолтондоо аав ээж, анд нөхөд, элгэн нутаг, ард түмнээ магтан дуулах ажээ.
Тоглолтонд урилгаар МУГЖ С.Батсүх, МУГЖ Л.Чаминчулуун, СТА Ж.Эрдэнэдалай, СТА Ч.Амаржаргал СТА Э.Мөнхбаяр, ЦДБЭЧ-ын найрал дуучид, бүжигчид нар оролцох нь ээ.
www.URLAG.mn