Өнгөрсөн зун Монгол, Австрийн хооронд дипломат харилцаа тогтоосны 50 жилийн ой тохиож, тус улсаас удирдаач, хийлч Жожи Хаттори, хормейстер, удирдаач Жералд Верт, дуурийн найруулагч, Венийн хөгжмийн их сургуулийн багш Беверли Блэнкеншип, босоо ятга хөгжмийн багш Тина Зердин, виолончель хөгжимчин, багш Ута Корфф нар УДБЭТ-т зочилж, хамтарсан тоглолт зохион байгуулсан билээ. Тэгвэл энэ сарын 21-нд босоо ятгач Тина Зердин манай улсад дахин зочилж, УДБЭТ-ын хөгжимчидтэй хамтран тоглохоор болжээ.
Венийн консерваторийн багш тэрбээр өмнө нь манай улсад ирэхдээ “Би сүүлийн арван жил танай улсад тоглоогүй босоо ятга хөгжмийг сэргээн дэлгэрүүлэх зорилгоор ирсэн” хэмээн ярьж байсан юм. Симфони найрал хөгжимд уянгалаг аялгуу нэмдэг энэ хөгжмийн зэмсгийг тоглож байгаа бүсгүйчүүд ч үзэсгэлэнтэй харагддаг. Кино, жүжигт ч энэ хөгжмийн тэр дүрслэлийг ашиглах нь элбэг.
Өмнө нь манай улсад ирэхдээ Тина Зердин “Хунт нуур” балет, “Тоска” дуурьт босоо ятгын гоцлол тоглож байсан бол энэ удаагийн хөтөлбөр хараахан тодроогүй байна.
Ж.СОЛОНГО/Өнөөдөр/
