Бодол тэнүүчлээд, сэтгэл тогтохгүй, тайван сууж чадахгүй яарна. Хором мөч, цаг минут бүрийг алдах юм бол, хорвоо ертөнцийг ахиж хэзээ ч харахгүй юм шиг санагдана. Хэрвээ үлгэр байсан бол “мэлхий гүнж” болоод хувирсан бүсгүй буцаад л үзэсгэлэнт гүнж болж, аз жаргалтай төгсөнө. Харин энэ бол бодит амьдрал… Нэг л өөрчлөгдсөн бол буцаад бүхнийг эргүүлэх амаргүй. Гэхдээ амьдралд хүртэл аз жаргалтай төгсгөл гэж байдаг. Үүнийг л хүснэ.
Түүний тухай бичиж эхлэх зуур өдрөөс өдөрт орчлонг харахаа больж байгаа “хоёр нүд нь” гэсэн бодол толгойд эргэлдэнэ. “Ээж, дүү нар, эргэн тойрон бүх юм бүрэлзээд, амьсгалж ч чадахгүй манан дотор байгаа юм шиг…Явж ч чадахгүй, харж ч чадахгүй гэж бодохоор амьд явах ч хэрэггүй юм шиг санагддаг. Өдөр бүр өөрийгөө юм харахаа больж байгааг мэдрэх…”гэсэн түүний үгс бодлоос салахгүй.
Энэ бүсгүй бол сэргэлэн авхаалжтай харцтай, сэтгэлийн их тэвчээртэй, дайчин, хөдөлмөрч, уран бүтээлч, дуучин Г.Бадамцэцэг. Ийн учирлахын учир тэрээр тэргэнцэртэй ч гэсэн дуугаа дуулж, сонсогч олондоо хүргэхийн төлөө юунаас ч шантралгүй хөдөлмөрлөдөг. Тэрээр МУГЖ Бат-Эрдэнэтэй хамтран дуулсан “Хавар хайр дагуулж ирдэг” дуугаараа олон нийтэд танигдсан.
Цэл залуухан, 19 насандаа орон нутагт тоглолтоор явж байгаад осолд орж, суумгай болсон Бадамцэцэг бууж өгөөгүй. Тэргэнцэртэй болсон ч орон нутгаар аялж, тайлан тоглолтоо хийж байсан тэрээр “ганц намайг амьд явуулж байгаа юм чинь л энэ шүү дээ” гэж байсан юм. Тэргэнцэртэй гэж түүртэлгүй, хэдэн сараар хөдөө орон нутгаар явж байгаагаа хамгийн жаргалтайд тооцно. 10 гаруй жилийн өмнөх осол түүнийг суумгай болгосон. Гэтэл одоо ахиад л түүнийг хараагүй болгох гэж байна. Нүдний торлог бүрхэвч нь унаж байгаа учраас шинээр суулгах шаардлагатай болсон. Мэдээж, энэ бүхэнд мөнгө хэрэгтэй. Сэтгэлийн тэвчээртэй, зорилготой энэ бүсгүйд туслахсан гэсэн сэтгэлдээ хөтлөгдөн үүнийг бичиж сууна.
Дэгэж дэрвэх насанд нь хоёр хөлийг нь авч одсон осол. Харин одоо хорвоог харах хоёр нүдийг нь харанхуйлсаар…Гэхдээ Г.Бадамцэцэг бууж өгөхгүй ээ. “Хамгийн гол нь би сэтгэлээр унаж болохгүй. Би энэ бүхнийг яалахгүй бол өөрөө ялагдчих гээд байдаг” гэх түүний энэ үгнээс ялах, ялагдах гэсэн хоёрхон сонголт байдаг юм шиг санагдана. “Сэтгэлээр унах л юм бол тэр дор нь өөд нь татаж, сэтгэлээ чангалах хэрэгтэй. Ахиад олон уран бүтээл хийж, хүмүүст хүргэх мөрөөдлөө биелүүлнэ” гэж итгэлтэйгээр хэлэх түүний цоглог харцнаас хүсэл зориг мэдрэгдэнэ.
Үлгэр бүхэн аз жаргалтай төгсдөг. Үүнтэй адил амьдрал ч гэсэн аз жаргалаар дүүрэн байг…Өдрөөс өдөрт хараагүй болж байгаа энэ бүсгүйд туслах хүмүүс эргээд холбогдоно уу.
Эх сурвалж: new.mn
