Кэмерон Диас шинэ ном гаргав 2013 оны 12 сарын 14 Холливудын жүжигчин Кэмерон Диас элдэв оо, энгэсэггүйгээр тун дажгүй харагдаж байгаагаа үзүүлэв. Өөрийн бахархлын мөчийг тэрээр шүтэн бишрэгчидтэйгээ хуваалцахаар шийджээ. Нийгмийн сүлжээн дэх өөрийн хуудсанд жүжигчин бүсгүй шинэ номоо тэвэрч буй гэрэл зургаа тавьсан аж.
Дор нь тэрээр “Анхны эх хувийг нь гардаж авлаа” хэмээн баяр баяслаа нуулгүй бичсэн байна. Өдгөө 41 настай жүжигчин бүсгүй "The Body Book" нэртэй ном бичээд үүнийгээ эмэгтэйчүүд болон тэдний бие цогцост зориулсан гэдгээ өгүүлэв. Энэ ном өөрийн биеийн галбирыг хэрхэн төгс төгөлдөр болгоход зааж сургахаас гадна илүү аз жаргалтай, эрүүл саруул, эрч хүчтэй болох томьёог агуулж байгаа аж. Жүжигчин бүсгүй өөрөө ч биеийн галбираа эртнээс тууштай арчилж байгаа нэгэн билээ. Тэрээр зөв хооллолтын ачаар л гоё сайхан харагдаж байгаа гэдгээ ярьжээ. Тэрээр хоол хүнсэндээ анхаарахын сацуу зөв хооллохыг эрхэмлэдэг байна. Түүний бичсэн шинэ ном худалдаанд энэ оны сүүлчийн өдөр гарах юм.