“The booker prize” шагнал гардуулах ёслол энэ сарын 12-нд Лондон хотноо болж өндөрлөлөө.
Эл шагнал 1968 онд бий болж, анхны шагналыг 1969 онд гардуулсан түүхтэй. Түүнчлэн 2013 он хүртэл тус шагналыг зөвхөн Их Британийн Хамтын нийгэмлэгийн орнууд болон Ирланд, Зимбабве улсын зохиолчдод л олгодог байсан бол түүнээс хойш бусад орны зохиолчид өрсөлдөх эрхтэй болсон юм. Хамгийн гол шалгуур нь шагналд өрсөлдөх бүтээл англи хэл дээр бичиж, хэвлэгдсэн байх ёстой аж.
Өнөө жилийн “The booker prize” шагналыг Их Британийн зохиолч Саманта Харви “Оrbital” хэмээх номоороо хүртсэн байна. Шүүгчид түүний бүтээлийг “Уншигчдад дэлхий ертөнцийг сонин содон, цоо шинээр мэдрүүлэх гайхалтай зохиол болсон” хэмээн үнэлжээ.
Зохиолч Саманта Харвигийн энэхүү “Orbital” хэмээх богино хэмжээний зохиолд Олон улсын сансрын станцид ажиллаж байгаа зургаан сансрын нисгэгчийн тухай өгүүлдэг ажээ. Тэрбээр эл зохиолоо цар тахлын хөл хорионы үеэр бичиж эхэлсэн бөгөөд яг жилийн өмнө хэвлүүлсэн гэнэ. Одоогоор түүний эл ном 29 мянган хувь борлогдоод байгаа ажээ.Түүнчлэн тэрбээр шагналаа гардахдаа уг шагналыг эх дэлхийнхээ төлөө гэсэн зүрх сэтгэлтэй, дэлхийгээ хайрладаг, энх тайвныг уриалж, энх тайвны төлөө ажилладаг хүн бүрт зориулж байгаагаа илэрхийлсэн юм.
Сонирхуулахад, “The booker prize” шагналыг дагалдаж 50 мянган фунт стерлингийн мөнгөн шагнал мөн зохиолчид очдог байна.
