“Баянмонгол”-оор овоглож, орчин цагийн хөгжмийн урлагт үнэтэй хувь нэмрээ оруулсан, Монголын эстрад жазз хөгжмийн урлагийн ноён оргил домогт эрхэм бол Монгол Улсын Төрийн соёрхолт, Урлагийн гавъяат зүтгэлтэн, “Баянмонгол” чуулгын ерөнхий удирдаач, СУИС-ийн хүндэт профессор, хөгжмийн зохиолч, хүндэт маестро Бадамдоржийн Ганбат билээ.
Хүндэт маестрогийн 70 насны ойд зориулан “Баянмонголын Ганбат” хэмээх пянзыг гэр бүл, үр хүүхдүүд нь бүтээж, гэгээн дурсгалыг хүндэтгэн аялгуу эгшигт сайхан бүтээлүүдийнх нь дээжсээр суварга босгожээ.
Энэхүү пянзны баяр буюу хүндэтгэлийн концерт маргааш буюу арванхоёрдугаар сарын 17-нд 17:00 цагт Улсын филармонийн концертын танхимд болно. Төрийн соёрхолт “Баянмонгол” чуулга, удирдаач С.Саруул-Од, “Чингис хаан” хамтлагийн ахлагч, Ардын жүжигчин Д.Жаргалсайхан, Ардын жүжигчин Ш.Чимэдцэеэ, Гавьяат жүжигчин Ж.Уранчимэг, П.Хатанбаатар, дуучин С.Сэрчмаа, Н.Наранбаатар, “Fire” хамтлагийн дуучин Д.Даваадалай, залуу дуучин П.Хан-Уул нар оролцох аж.
