WWE буюу үзэгчдийн хэлж заншсанаар “нохой зодоон”-ы хамгийн олон үзэгчтэй “Raw” шоу, арга хэмжээнүүд энэ жилээс эхлэн “Netflix” платформоор цацагдаж эхлээд байна.
Энэ жилийн анхны “Raw” шоу арга хэмжээ АНУ-ын Лос Анжелес хотод болж, спорт болон энтертайнментыг хослуулсан энэхүү холбооны супер одууд болох The Rock, Triple H, The Undertaker, Жон Сена нар оролцож, үзэгч шүтэн бишрэгчдээ баярлуулаад байна. Мэргэжлийн “нохой зодоон”-ы долоо хоног тутам зохион байгуулдаг “Raw” шоу арга хэмжээ 31 жилийн турш төрөл бүрийн телевизийн сувгуудаар Америк болон дэлхий даяар цацагддаг байсан бол энэ жилээс эхлэн Netflix-ээр гарч эхлээд байгаа нь энэ юм.
Дээрх шийдвэрийг WWE компанийг холимог тулааны UFC холбоотой нэгтгэсний дараагаар TKO толгой компанийн удирдлагууд гаргасан бөгөөд “Raw” шоу арга хэмжээг дамжуулах болон WWE-ийн архивын контентуудыг цацах эрхийн төлөө Netflix компани таван тэрбум ам.доллар төлөх тохиролцоонд хүрсэн байна. “Raw” шоу арга хэмжээ нь долоо хоног бүр 17.5 сая үзэгчийг татдаг бол “нохой зодоон”-ы WWE холбоо нь төрөл бүрийн платформууд дээр нийт нэг тэрбум орчим дагагчтай ажээ. Зөвхөн “Raw” гэлтгүй “SmackDown”, “NXT” болон бусад шууд арга хэмжээнүүдийг Netflix-ээр үзэх боломжтой болсноос гадна “WrestleMania”, “SummerSlam”, “Royal Rumble” зэрэг тусгай шоу арга хэмжээнүүдийг төлбөр төлж үзэх боломжтой юм байна.
