МЗЭ-ээс жил бүр уламжлал болгон зохиож оны шилдэг яруу найраг, шилдэг шүлэгчийг тодруулдаг “Болор цом” их наадам анхлан 1983 онд зохиогдсон цагаас хойш өдгөө 31 дахь жилийнхээ босгыг алхаж байна. Оны шилдэг яруу найраг, шилдэг шүлэгчийг тодруулдаг утга уянгын их наадам “Болор цом-31” нэгдүгээр сарын 25-нд Өвөрхангай аймгийн Арвайхээр хотод болно. Тус наадмыг өнөө жил Өвөрхангай аймагт зохиож байгаа нь орон нутагт дөрөв дэх удаагаа болж байна.
Энэ жилийн “Болор цом-31” яруу найргийн наадам нь хөдөлмөрийн баатар, Ардын уран зохиолч Д.Пүрэвдорж агсаны мэндэлсний 80 жилийн ой тохиож буйгаараа онцлог юм.. Тэрбээр “Болор цом” наадмыг анх санаачилсан бөгөөд энэ нь улсын чанартай хамгийн том яруу найргийн наадам болсон билээ. Тиймээс тус наадмыг МЗЭ 85 жилийнхээ ойгоор нутагт нь зохион байгуулахаар болжээ. Орон нутагт дөрөв дэх удаагаа зохион байгуулж буй энэ наадмын түрүүг өнөө жил хэн авах тухай яриа утга зохиолын хүрээнийхэн төдийгүй уншигч, үзэгчид ч таамаг дэвшүүлсээр байна.
Сүүлийн жилүүдэд уг наадамд оролцогсдын шүлгэн хүлэг нь улам чангарч буйгаас гадна залуужсан нь олны таашаалд ихэд нийцэж байгаа билээ. Өнгөрсөн жилийн “Болор цом-30” наадмыг яруу найрагч Н.Гантулга хүртэж байсан юм. Тэгвэл энэ жилийн шилдэгүүд хэн байх вэ гэсэн таамагт “Шинэ мянган” утга зохиолын нэгдлийн гишүүн, МЗЭ-ийн шагналт яруу найрагч Л.Ганзул, В.Нэргүй, Б.Баттулга, “Г.Сэр-Одын нэрэмжит шагнал”-т яруу найрагч О.Цэнд-Аюуш нарын нэр байгаа аж. Түүнчлэн Өвөрхангай аймагт зохион байгуулагдаж байгаа учир “Болор цом”-ын эзэн яруу найрагч Б.Ичинхорлоог гурав дахь удаагаа ч түрүүлж магадгүйгэх таамаг байна. Үүнээс гадна нутгийн яруу найрагч, МЗЭ-ийн гишүүн С.Дамдиндорж, МЗЭ-ийн шагналт яруу найрагч М.Наранболд нарын нэр ч сонсогдож буй сурагтай. Ямартаа ч уран үгийн шидийг гайхуулсан уран бүтээлчид маань удахгүй шүлгэн хүлгээрээ уралдана. Тэр мөчид хэний сойсон шүлэг цойлохыг сонсогч олон тэсэн ядан хүлээж байна.
www.URLAG.mn
