Тайванийн жүжигчин, дуучин, телевизийн хөтлөгч Барби Сюй өчигдөр /2025.02.02/ зуурдаар таалал төгсжээ.
Монголын үзэгчдийн “Солирын од” буюу “Meteor garden” киноны сэргэлэн охины дүрээр танигдсан Барби Сюй 1976 онд Тайванийн Тайпэй хотод мэндэлжээ. Тэрбээр 2001 онд “Солирын од” телевизийн олон ангит кинонд тоглон уран бүтээлийн гараагаа эхэлж, үргэлжлүүлэн “The monkey king: Quest for the Sutra”, “Eternity: A Chinese ghost story”, “Mars”, “Say yes enterprise”, “Phantom lover”, “Corner with love”, “Summer’s desire” зэрэг олон ангит кино, “The ghost inside”, “Silk”, “Connected”, “My so called love”, “On his majesty’s secret service”, “Hot summer days”, “Future X cops”, “Adverture of the King”, “Reign of assassins”, “My Kingdom”, “Croczilla”, “Motorway” зэрэг бүрэн хэмжээний уран сайхны кинонд тоглож байв.
Түүний дүү, телевизийн хөтлөгч Ди Сюй цахим хуудсандаа “Санаа тавьсан хүн бүхэнд баярлалаа. Сар шинийн баяраар манай гэр бүл Япон руу аялалаар явсан. Харамсалтай нь бидний хайрт эгч Ши Юань (Барби Сюй) ханиад, уушгины хатгалгаа өвчнөөр нас барлаа. Амьдралынхаа турш эгч дүүс болж, нэг нэгнээ түшиж, харж хандаж явсанд тань талархаж байна. Таныгаа үүрд санаж, талархаж амьдрах болно” гэжээ.
