Монголын суут хөвгүүдийн нэг, төр нийгмийн нэрт зүтгэлтэн, яруу найрагч Очирбатын Дашбалбарын мэндэлсэн өдөр өнөөдөр тохиож байна. Тэрбээр Сүхбаатар аймгийн Наран суманд 1957 оны энэ өдөр буюу хоёрдугаар сарын 10-нд мэндэлжээ.
Тэрээр нутагтаа бага, дунд сургууль дүүргэж, Омскийн хөдөө аж ахуйн ТМС, Горькийн нэрэмжит утга зохиолын дээд сургуулийг тус тус төгсжээ.
1985 оноос Монголын зохиолчдын эвлэлийн гадаад харилцааны мэргэжилтэн, “Утга зохиол урлаг” сонины ажилтан, 1990 оноос МҮЧЗЭ-ийг байгуулж, тэргүүлэгч даргаар нь ажиллаж байв.
О.Дашбалбар дунд сургуульд байхаасаа шүлэг зохиол бичиж, улмаар Монголын яруу найргийн сод билигт төлөөлөгч нь болсон юм. “Оддын аялгуу”, “Гол ус намуухан урсана”, “Гэрэлт хайр”, “Зүүдний мөнгөн шувуу”, “Бурханы мэлмий”, “Цаг хугацааны гуниг буюу орон зай дахь дүрсүүд” зэрэг яруу найргийн ном хэвлүүлж, Монголын утга зохиолд мөнхийн суварга бүтээсэн юм.
Тэрбээр бурхан шашин, соёлын өвийг хамгаалах, дэлгэрүүлэх, сэргээх, хийгээд Монголын газар шороо, нийгмийн баялаг, ард түмнийхээ язгуур эрх ашгийг хамгаалахад амь амьдралаа зориулсан нийгэм, соёл,шашин, улс төрийн гарамгай зүтгэлтэн байлаа.
Монгол Улсын шинэ үндсэн хуулийг батлалцсан АИХ-ын депутатаас гадна Сүхбаатар аймгийн 63 дугаар тойрогт УИХ-ын гишүүнээр сонгогдож, Монголын парламентэд ард түмний дуу хоолойг илэрхийлж байлаа.
Түүнийг 1999 онд таалал төгссөний дараа 2007 онд “Оюун санааны яруу найраг” ном нь хэвлэгдсэн бол “Гол ус намуухан урсана”, “Газрын төлөөх тулалдаан эхэллээ”, “Оюуны санааны яруу найраг” номыг нь Английн Монголын уран зохиол судлаач, орчуулагч Саймон Вэккхам Смит англи хэлнээ орчуулан хэвлүүлсэн юм.
