Цэнхэр дэлгэцээр “Music 9” хөгжмийн нэвтрүүлгэрээ үзэгчидтэй уулздаг жүжигчин, хөтлөгч Т.Өөдөө урлагийн шинэ төсөл эхлүүллээ. Тэрбээр “Music 9” нэвтрүүлгийнхээ 10 жилийн ойд зориулан “Alfa music” залуу уран бүтээлчдийг дэмжих төслийг хэрэгжүүлж байгаа бөгөөд фейсбүүк, youtube зэрэг онлайн хуудсаар дамжуулан залуусын оролцоотойгоор шилдгийг шалгаруулах нь ээ.
Төслийн хэвлэлийн бага хурал өнөөдөр 14.00 цагт “Grand Khaan Irish pub”-д болох гэж байна. Уг төсөлд дуучин Г.Тэнүүн, Б.Солонго, П.Баярцэнгэл, С.Хишигжаргал, Б.Чойжилсүрэн, Н.Номин нар өрсөлдөж байгаа бөгөөд төслийн багийнхан өнөөдөр найман үе шаттай үргэлжлэх “Alfa music” төслийн тухай танилцуулах нь ээ.
Төслийн хүрээнд оролцогчдын шинэ уран бүтээлийг олон нийтэд түгээж, хамгийн их санал авсан, хэр сайн оролцож байгаа зэрэг гол шалгууруудыг харгалзан үзэж ялагчийг тодруулах юм байна.
Нэгдүгээр байрт шалгарсан уран бүтээлч дэлхийн алдартай оддын тоглолт үзэх эрх гардах бол хоёрдугаар байранд шалгарсан дуучин видео клип хийлгэх эрхээр шагнуулах нь ээ.
