СУИС-ийн оюутан ахуйдаа “Шинэ үе” продакшнаас уран бүтээлийн гараагаа эхэлж, өдгөө “Мөрөөдлийн театр”-аар “овоглож” буй уран бүтээлч бол жүжигчин Ц.Алдармаа. Тэрбээр дэлгэцийн уран бүтээлийн гараагаа “Буруу эргэлт” киногоор эхэлж, үргэлжлүүлэн “Цасан охин”, “Гарал угсаа”, “Хоёр хоёрын тав”, “Гурван найз”, “Би дурламаар байна”, “Хөөрхөн шулам”, “Ядуугийн зовлон-2”, “Нинжин сэтгэл”, “Яллагч”, “Маш нууц-2: Байтаг Богд”, “Эхиймаа”, “Буруу өрөг”, “Өвөл”, “Single guys”, “Заваан авга ах” бүрэн хэмжээний уран сайхны болон телевизийн олон ангит кинонуудад гол болон туслах дүрд тогложээ.
Харин тайзны уран бүтээлийн тухайд тэрбээр “Шинэ үе” продакшны шоу тоглолтуудаас гадна “Мөрөөдлийн театр”-ын уран бүтээлүүд, онцолбол 2019 онд “Дундын бүсгүй”, 2020 онд “Галзуу хот” шоу драм, өнгөрсөн онд “Тод хувцастай эмэгтэй” уянгын драмын жүжгээр үзэгчидтэй “уулзсан” бол энэ гуравдугаар сарын 5-наас “Мөрөөдлийн театр”-ын тайз, дэлгэцийн 24 дэх уран бүтээл болох “Samsara-Тэртээх хоёр зүрх” драмын жүжгийн гол дүрээр тайзнаа гарч байна.
