Найруулагч Ц.Хүсэлбаатар, Гавьяат жүжигчин С.Өлзийхүү нарын отгон хүү Х.Сумъяадорж мөн л урлагийн салбарт хөл тавиад буй. Анагаахын чиглэлээр суралцаж байсан ч өвөө, аав ээжийнхээ мэргэжлийг өвлөхөөр шийдсэн тэрбээр СУИС-ийг 2023 онд төгссөн. Сургуулиа төгссөнөөс хойш тэрбээр “Хиртээгүй сарнай”, “Сорил”, “Эргэх учрал”, “Дайрлага”, “Өвлийн идэш”, “Хүлээх өрөө” зэрэг бүрэн хэмжээний уран сайхны кино, мөн “Бүлэг”, “Бид нэг гэр бүл”, “Өв залгамжлагч”, “Амьдрах сайхан” зэрэг телевизийн олон ангит киноны гол болон туслах дүрд тоглоод буй. Түүнчлэн өнгөрсөн оны гуравдугаар “Монгол” театрын “Клеопатра” сонгодог драмын жүжгийн Октавиан жанжны дүрээр мэргэжлийн тайзнаа анхлан гарч, үргэлжлүүлэн аравдугаар сард “Маск” продакшны “Масктай Монгол” хошин шоу тоглолтод оролцсон. Тэгвэл тэрбээр өнөөдрөөс “Orange” энтертайнмент, VOO-гийн хамгийн бүтээл, Монголын анхны түүхэн, детектив “Мөрч” олон ангит киноны дүрээр үзэгчидтэй цэнхэр дэлгэцээр “уулзах” гэж байна.
