Сонсголын бэрхшээлтэй иргэдийн соёлын төв, “Монолит” продакшн, Социал демократ Монголын залуучуудын холбоо хамтран “Deaf Nomads” буюу “Сонсголын бэрхшээлтэй нүүдэлчин” баримтат киног бүтээжээ. Тус уран бүтээл Тайланд улсын Бангкок хотноо өнгөрсөн хоёрдугаар сарын 26-нд зохион байгуулсан “Ази, Номхон далайн улс орнуудын тогтвортой хөгжлийн зорилтын форум 2025”-ын үеэр нээлтээ хийж, цаашид Италийн Роме, Японы Токио зэрэг хотуудад үзүүлэх урилга хүлээн авсан байна.
Малчид жилийн дөрвөн улиралд мал аж ахуйгаа эрхлэхийн зэрэгцээ улс орны газар нутгийн бүрэн бүтэн байдлыг хангаж, уламжлалт соёл, ахуйг өвлүүлэн үлдээх үүрэг хүлээдэг. Өвөлдөө -40, зундаа +40 градуст уламжлалт аж ахуйгаа сайн дураар эрхэлж, өв соёлыг хадгалж байна.
Амьдарч буй буйдхан газартаа тэд эзэн сууж, нийгмийн үйлчилгээг хотын иргэд шиг хүртэж чадахгүй байгаа нь дэлхий дээрх сүүлчийн нүүдэлчдийн хамгийн том бэрхшээл болон хувирчээ. Ялангуяа хүн, малын эрүүл мэндийн тусламж үйлчилгээ хүргэхэд гол хүндрэл үүсч байна. Эдгээр асуудлыг “Сонсголын бэрхшээлтэй нүүдэлчин” баримтат кинонд тусган үзүүлжээ.
Монгол малчдын амьдрал ахуйг олон улсад таниулах зорилгоор “Deaf Nomads” эхлүүлсэн. Уг киногоор хөгжлийн бэрхшээлтэй иргэдийн эрүүл мэнд, сурч боловсрох эрх, уур амьсгалын өөрчлөлт малчдад ямар нөлөө үзүүлж байна, нүүдэлчин соёл гэсэн гурван сэдвийг хөнджээ.
Сонсголын бэрхшээлтэй иргэдийн соёлын төв, “Монолит продакшн”, Социал демократ Монголын залуучуудын холбооны хамтарсан энэ төсөл цааш үргэлжилж, малчны хөдөлмөр эрхэлж буй сонсголын бэрхшээлтэй малчин өрхүүдийг малжуулах, 110 мянган хөгжлийн бэрхшээлтэй иргэн, тэр дундаа сонсголын болон харааны бэрхшээлтэй иргэдэд брайл үсгээр эсвэл дохионы хэлмэрчтэйгээр төрийн мэдээлэл, төрийн үйлчилгээг шууд хүргэдэг сувгийг байгуулахаар зорьж байна.
