Монголын залуучуудын холбооноос уламжлал болгон зохион байгуулдаг “Цагаан-Уул” хайрын шүлгийн наадам гэгээн хайрын өдөр гэгддэг энэ сарын 14-нд болох юм байна.
Энэ жилийн тус наадам хамрах хүрээгээ тэлж, орон даяар зохион байгуулагдаж байгаагаараа онцлогтой аж. Тодруулбал, аймаг бүрт “Цагаан-Уул” наадам болж, тухайн аймагтаа эхний гурван байрт шалгарсан найрагч улсын хэмжээнд зохион байгуулагдах наадамд оролцох эрхтэй болж байгаа юм.
Залуу уран бүтээлчдийг дэмжих, тэдний уран бүтээлийг үнэлж, нийтийн хүртээл болгох, олон нийтэд сурталчлах зорилготой энэхүү наадам Хайрын шүлэг, Хайрын тухай дууны үг шалгаруулах, Хайрын богино хэмжээний шүлгэн мессежний уралдаан гэсэн гурван төрлөөр явагдах юм байна. Өнгөрсөн жилийн наадамд залуу яруу найрагч Э.Бүжинлхам түрүүлж, удаах байруудад яруу найрагч Н.Минжинсайхан, Э.Энхболд нар шалгарч байсан юм.
Оросын шинжлэх ухаан соёлын төвд хоёрдугаар сарын 14-ний 09.00 цагт эхлэх 16-дахь удаагийн “Цагаан-Уул” яруу найргийн наадмын үүд хаалга үзэж сонирхохыг хүссэн бүх хүнд нээлттэй аж.
www.URLAG.mn
