Жүжигчин Р.Анхням Хятадын уран сайхны олон ангит түүхэн кинонд тоглож монгол жүжигчдийн ур чадварыг урд хөршид гайхуулаад авсан. Тэгвэл энэ удаад дэлхийн кино урлагт Монголынхоо нэрийг дахин гаргах нь ээ. Өнгөрөгч Каннын наадмын үеэр францын кино найруулагч Jean-Jacques Annaud өөрийн шинээр бүтээж буй "Wolf Totem" киноныхаа зураг авалтын үеийн дүрс бичлэгийг үзэгчдэд сонирхуулсан байна. Уг кино энэ онд үзэгчдэд хүрэх бөгөөд киног Хятадын зохиолч Jiang Rong-ий ижил нэрт зохиолоос сэдэвлэн бүтээж байгаа аж.
Кино төслийг China Film Group санхүүжүүлж байгаа бөгөөд 38 сая ам.долларыг бүтээлд төсөвлөжээ. Харин дүрүүдийн хувьд тодорхойгүй байсан бөгөөд зарим нь эхнээсээ мэдэгдэж эхэллээ. Энэхүү киноны гол баатар Chen Zen-ий дүр л олон нийтэд хамгийн түрүүнд ил болоод байгаа бөгөөд Хятадын залуу жүжигчин Feng Shaofeng тоглож байгаа юм байна. Харин кинонд ганцхан монгол жүжигчин тоглосон нь “Мөрөөдлийн хөлөг онгоц”, “Хайрын эрэлд”, “Цагдаагийн тангараг”, “Гаадаа Мээрин”, “Секс эрх чөлөө” зэрэг кинонуудаараа олонд танигдсан жүжигчин Р.Анхням байжээ.
Түүнчлэн 2000 оны дундуур бүтээгдсэн “Үнсэлт” хэмээх эротик кинонд гол дүрийг бүтээж байсан билээ. Харин түүний шинэхэн дүр тун удахгүй үзэгчдийн хүртээл болох нь ээ.
