Улсын филармонийн хамт олон бяцхан үзэгчиддээ зориулан Францын хөгжмийн зохиолч К.Сен-Сансын “Амьтдын ертөнц” цуврал бүтээлийг энэ сарын 19-нөөс эхлэн тоглохоор болжээ. Амьтны хүрээлэнд тахиа, халуун орны сүүн тэжээлтэн заан, илжиг, имж, яст мэлхий, хөхөө, хун, араатны хаан арслан тэргүүтэй бусад амьтад хөгжимтэй наадам хийх гэнэ. Их хуур хөгжмийн хүнд аянд хүүхдүүд хөдөлгөөнгүй том зааныг амархан төсөөлнө. Сонин содон имжний харайлтыг төгөлдөр хууран дээр үсчих хам эгшгүүд илтгэнэ. Эвэр бүрээ донгодож буй бол хөхөө, флейт жиргэж үзэгчид шувууны үүрээр зочилно. Амьтдын жинхэнэ наадам Улсын филармонид гурван өдөр болох ажээ.
