Монгол Улсын Соёлын тэргүүний ажилтан, ОХУ-ын Буриад Улсын Гавьяат жүжигчин Б.Амархүү “Музыка для души” уран бүтээлийн тоглолтоо дуучин Б.Баярцэцэгтэй хамтран толилуулах гэж байна. Эл тоглолт тавдугаар сарын 9, 10-нд “Skywing” төвийн тоглолтын танхимд 19.00 цагаас болно.
Ааваараа хөтлүүлэн урлагт хөл тавьсан Б.Амархүү ОХУ-д зохион байгуулдаг “Народный артист” дууны уралдаанд 2006 онд тэргүүн байр эзлэн олны танил болж, “Пример министр” хамтлагийн гишүүн явсан юм. Б.Амархүү амьдралынхаа ихэнх жилүүдийг ОХУ-д өнгөрүүлсэн ч сүүлийн жилүүдэд эх орондоо уран бүтээлээ туурвиж буй. Тэрбээр дуулахаас гадна жүжиглэх авьяастайгаа “Big fish, “Татар ажиллагаа”, “Хязгаар нутгийн зүгт”, “Зүсэм зүрх” зэрэг кинонд тоглож, мөн “Яг түүн шиг” шоу нэвтрүүлэгт амжилттай оролцон батлаад авсан юм. Тэрбээр өнгөрсөн 2023 онд “Хайртай шүү, ээж ээ” тоглолт, мөн тэнгэрт байгаа аавдаа зориулан “Бахархал” нэртэй тоглолтоо толилуулсан бол энэ оны гуравдугаар сард “Эрхэмсэг үдэш” VIP тоглолтыг хийсэн.
Хамгийн сүүлд тэрбээр реппер Young Mo’G-тэй хамтарсан “Бессонница”, реппер Baynaa-тай хамтарсан “Эрдэнэсийн арал” киноны дууг сонсогчдод хүргээд буй.
