Дэлхий даяар хамгийн олон уншигчтай зохиолчдын нэг болох Мүраками Харүкигийн хамгийн сүүлд бичсэн “Хот ба түүний Хийсгэлэн хана” роман нь зохиолчийн тархийг хамгийн удаан “гашилгасан” нь гэж хэлж болно.
31 насандаа эхлүүлсэн эл зохиолоо бүрэн бүтэн болгох мөч зохиолчийн 71 насанд тохиожээ. Зохиолын хүүрнэгч эзэн, “зүүд уншигч” эр бага залуудаа нэгэн охинд дурлаж буйгаар зохиол эхэлнэ. Харин тэр нь өөрийг нь нэг насаар тарчлаах дурсамж болон хувирахыг зүүд уншигч эр яахин мэдэх билээ.
Энэхүү романд ч япон зохиолчийн уран бүтээлийн салшгүй шинж чанар болох ганцаардал тусгаарлал, хүний сэтгэлийн гүнд далдлаастай байдаг нууцуудын судалгаа шинжилгээ нь үргэлжилж буй. Бусад зохиолынх нь нэгэн адил уншигчид энд ч бодит байдал, уран сэтгэмж хоёрын хил зааг уусан нийлсэн, учир битүүлэг, хамаг сэтгэл санааг уусган татах ертөнцөөр аялах болно.
…Учир битүүлэг хана бүхий энэ хот бол хүний ухаан бодол, айдас түгшүүр, эргэлзээ тээнэгэлзэл, зааг хязгаарыг тодорхойлсон метафор ертөнц юм. Энэ ертөнцийн “амьдрал” уншигчийг хааш нь ч зайлах аргагүй болтол дагуулаад зогсохгүй, бодит байдал хийгээд ухаан бодол дахь эрх чөлөөний төрөлх мөн чанарын тухай гүн эргэцүүлэлд дуудах нь дамжиггүй. Энэ бүхэнд Мүраками нөгөө л мастер чадвараа харуулсанд нь бүү эргэлзээрэй.
