Нийслэлийн Засаг дарга бөгөөд Улаанбаатар хотын захирагчийн ивээл дор зохион байгуулж буй “Улаанбаатар биенналь 2025” олон талт соёл, урлагийн нэгдсэн үйл ажиллагааг зохион байгуулж буй. Эл арга хэмжээнд нийт дэлхийн 29 орны 300 орчим гадаад оролцогчид, 22 багц үйл ажиллагааг 06 сарын 06-20-ний өдрүүдэд буюу 15 хоногийн турш хүргэх юм.
“Улаанбаатар биенналь 2025”-ын хүрээнд “Metamorphosis” буюу “Хувьсахуй” дизайнеруудын хамтарсан үзэсгэлэнг 06 дугаар сарын 10-нд “A space”-д дэлгэлээ. Үзэсгэлэнгийн нээлтэд нийслэлийн Соёл, урлагийн газрын Соёлын үйлдвэрлэл, урлагийн хэлтсийн дарга Ч.Батчимэг, Монголын урлагийн зөвлөлийн гүйцэтгэх захирал О.Одгэрэл нар оролцов.
“Metamorphosis” үзэсгэлэнгийн куратороор “Ариунаа Сүри” брэндийн үүсгэн байгуулагч, хувцасны дизайнер С.Ариунаа ажиллажээ. Эл үзэсгэлэнгийн үеэр “Бажуна” брэндийн үүсгэн байгуулагч Б.Батсүхийн “Бясалгалын гэр ба эсгий урлал” инстоляц, А.Очирболд, С.Ариунаа нарын хамтарсан “Ухамсар” холимог техникийн инстоляцийг мөн сонирхууллаа. Энэхүү үзэсгэлэн нь гэрэл зураг, хувцас загвар, бүтээгдэхүүн, хэвлэлийн дизайныг хамруулсан бөгөөд гэрэл зургуудыг коллаж хэлбэрээр уран сайхны сэтгэлгээтэй, өвөрмөц хээ дүрслэлүүдийн хамтаар даавуу, арьсан дээр буулган бүтээснээ толилуулж, уламжлал ба шинэчлэлийг холбосон амьд орон зайд монгол ахуй, түүхэн өвийг орчин үеийн хэлээр хөрвүүлж үзүүлснээрээ онцлог байлаа.
