Хятадын 2005 оны хамгийн шилдэг зохиолоор шалгарч, монгол хэлийг оролцуулан дэлхийн 32 улсын хэлээр хэвлэгдсэн "Чонон сүлд" роман кино хэлбэрээр 2015 оны хоёрдугаар сард 3D-ээр дэлгэцнээ гарах нь ээ.
Тус киног Францын нэрт найруулагч Жан-Жак Анно найруулж байгаа бөгөөд ӨМӨЗО-нд 2013 оны дөрөвдүгээр сараас эхлэн зураг авалтаа эхлүүлжээ. Тус киног бүтээхэд ойролцоогоор 38 сая ам.доллар зарцуулах тооцоо гарчээ.
"Чонон сүлд" номыг зохиолч Зян Рун (жинхэнэ нэр Люй Жяминь) 1997 оноос 2004 онуудад бичиж дуусган хэвлэлд гаргаснаар 100 гаруй орны сая сая уншигчийн ширээний ном болж чаджээ. 2009 оноос эхлэн манай улсад борлуулагдаж эхэлсэн бөгөөд Монгол улсын нэрт хятад судлаач Д. Болдбаатар орчуулж, "Дэлхийн сонгодог зохиол" цувралын 51 дэх ном болж Монголд хэвлэгдсэн байна. "Чонон сүлд" роман нь нийт хураангуй, дэлгэрэнгүй, хүүхэд залуучуудад зориулагдсан "Бэлтрэгхэн" гэсэн 3 хувилбартай байдаг.