Америкийн Тафтсын их сургуулийн судлаачид 46 мянга гаруй хүний кофе хэрэглээ болон наслалт хоорондын хамаарлыг судалж, хар кофе тогтмол хэрэглэдэг хүмүүсийн амьдрах хугацаа урт байгааг тогтоожээ. Энэхүү судалгаа The Journal of Nutrition эрдэм шинжилгээний сэтгүүлд хэвлэгдсэн бөгөөд 1999–2018 оны хооронд Үндэсний эрүүл мэнд ба хоол тэжээлийн судалгаа (NHANES)-ны мэдээлэлд үндэслэсэн байна.
Судлаачдын тайлбарласнаар, кофе нь био-идэвхт бодисууд, антиоксидантаар баялаг тул дархлаа, бодисын солилцоонд эерэг нөлөө үзүүлэх магадлалтай. Гэвч чихэр, хуурай сүү зэргийг нэмэх нь кофены боломжит ашиг тусыг сааруулж байгааг судалгаа харуулсан байна.
“Кофе бол дэлхий даяар хамгийн өргөн хэрэглэгддэг уух зүйлсийн нэг. Судалгаанд оролцогсдын тал орчим нь өдөр бүр кофе уудаг гэж хариулсан. Тиймээс түгээмэл зуршлын эрүүл мэндэд үзүүлэх нөлөөг бодитой судлах нь чухал” хэмээн тус судалгааны ахлах судлаач, профессор Фан Жан онцоллоо.
Энэхүү судалгаа нь кофе хэрэглээ болон урт наслалтын хоорондын хамаарлыг илрүүлсэн анхны тохиолдол биш юм. Сүүлийн жилүүдэд адил төстэй хэд хэдэн судалгаа хийгдсэн бөгөөд бүгд кофены тогтмол хэрэглээ нас баралтын эрсдэлийг бууруулж буйтай холбон тайлбарлажээ.
Эх сурвалж: CNBC
