УДБЭТ-ын дэлхийн сонгодог болон Монголын бүжгэн жүжгүүдэд гоцолж буй эл бүсгүйг Б.Марал гэдэг. Тэрбээр найман настайдаа Монголын хүүхдийн ордны бүжгийн дугуйланд суралцаж, балет, монгол, чөлөөт бүжиг заалгажээ. Үргэлжлүүлэн Хөгжим бүжгийн коллежид зургаан жил суралцаж төгссөн байна. 2016 онд сургуулиа төгссөнөөсөө хойш тэрбээр УДБЭТ-аар “овоглож” буй.
Б.Марал 2018 онд Ази номхон далайн балетын уралдаанаас алтан медаль, 2019 онд Япон улсын Токио хотноо мэргэжлийн балетын жүжигчдийн дунд зохион байгуулагдсан “Tokyo World Ballet Trial” олон улсын балетын уралдаанаас хүрэл медаль, мөн онд ОХУ-ын Улаан-Үүд хотноо зохион байгуулагдсан Орос-Япон Евро Азийн балетын анхдугаар уралдаанаас алтан медаль тус тус хүртэж байв. Хамгийн сүүлд тэрбээр энэ оны долдугаар сард БНХАУ-ын Сямэнь хотод зохион байгуулагдсан мэргэжлийн бүжигчдийн олон улсын уралдаанаас мөнгөн медаль хүртжээ.
Өдгөө Б.Марал П.И.Чайковскийн “Хунт нуур”-ын Одетта, Оделия, Н.А.Римский-Корсаковын “Шехеразада”-гийн Гюльнара гүнж, А.Аданы “Жизель”-ийн Мирта, Ж.Чулууны “Уран Хас”-ын Хандармаа, А.Энхтайваны “Хурмастын дагина”-ын Шаралдай Гоо хатан, Л.Минкусийн “Дон Кихот”-ын Гудамжны бүжигчин, П.И.Чайковскийн “Цөмөөхөй”-н Амттаны дагина, Цасн хатан зэрэг дэлхийн алдарт балетуудын гол дүрээр тайзнаас балетын урлагт шимтэгсэдтэй “уулздаг”.
