Монгол цэргийн музей харааны бэрхшээлтэй хүүхдийн танин мэдэхүй, хөгжил төлөвшлийг дэмжих, цаашид хөгжлийн бэрхшээлтэй иргэдэд музей үзүүлэн сурталчлах ажлыг ажлыг тасралтгүй явуулах зорилгоор музейнхээ “Эртний түүхийн”, “Шинэ түүхийн”, “Маршал хүндэтгэлийн” танхимууд болон “Генерал” булангийн танилцуулга, зарим үзмэрийнхээ тайлбарыг брайль үсгээр хийжээ.
Энэ ажлын хүрээнд музейн “Эртний түүхийн танхим”-д Сүхбаатар дүүргийн харааны бэрхшээлтэй хүүхдийн 116 дугаар тусгай сургуультай хамтарч ”Дайчин түүхээр аялахуй” боловсролын ажлыг зохион байгуулж, хоёр тал цаашид энэ чиглэлээр хамтран ажиллах гэрээнд гарын үсэг зурлаа.
Ингэснээр Монголд анх удаа музейн тайлбарыг харааны бэрхшээлтэй иргэдэд зориулан брайль үсгээр хийж, сургалт явуулж байгаа юм. Харааны бэрхшээлтэй иргэд музейд ирэх боломж нөхцлийг бүрдүүлэн, зарим үзмэр, эд өлгийг хүрч тэмтрэх боломж нээгдэж байна.
