Монголын орчин цагийн уран зохиолыг үндэслэгчдийн нэг, Алдарт гавъяат уран зохиолч Сономбалжирын Буяннэмэхийн нэрэмжит “Буяннэмэхийн таван хором” яруу найргийн наадам өнөөдөр боллоо. Наадмыг түүний нэрэмжит “Буяннэмэх номын өргөө”-ний хамт олон санаачлан Монголын залуу зохиолчдын нэгдэлтэй хамтран зохион байгуулсан юм. Энэ үеэр Монгол Улсын Соёлын гавъяат зүтгэлтэн цол тэмдгээр шагнуулсан Х.Зандраабайды, До.Цэнджав нарт хүндэтгэл үзүүлж, Монголын чөлөөт зохиолчдын холбооны гишүүн О.Бяруузанын “Мэнгэт халиун” хэмээх хүүхдийн номны нээлт давхар боллоо.
Ингээд яруу найргийн “Таван хором”-ын шүүгчдээр суусан Төрийн соёрхолт, СГЗ зохиолч Долгорын Нямаа, СГЗ судлаач Д.Цэдэв, Д.Нацагдоржийн шагналт яруу найрагч П.Нямлхагва нар яруу найрагчдад “Таван хором” гэсэн сэдэв өгсөн юм. Харин таван минутанд бичсэн шүлгүүдээ яруу найрагчид уншсаны дараа дүн гарч залуу яруу найрагч Т.Саранчимэг тэргүүлж, МЗЭ-ийн гишүүн яруу найрагч Т.Дарханхөвсгөл, залуу яруу найрагч, зураач Г.Мөнхбаатар нар удаалсан юм.
Дашрамд сонирхуулахад анх С.Буяннэмэх яруу найргийн дугуйланг санаачлан хичээллүүлж байхдаа “Таван хором”-д шүлэг зохион бичүүлдэг байжээ.
Д.БҮҮВЭЙ
