“Монгол–Хятадын Экспо” 2015 оноос анхлан зохион байгуулагдсан ба хоёр улс хоорондын “Иж бүрэн стратегийн түншлэл”-ийн хүрээнд хоёр жил тутамд БНХАУ-ын Өвөр Монголын Өөртөө Засах Орны Хөх хотод уламжлал болгон зохион байгуулагдлаа.
Энэ жилийн экспод нийт 3,000 гаруй аж ахуйн нэгж оролцож байгаагийн дотор Монгол Улсаас 350 гаруй бизнес эрхлэгч, аж ахуйн нэгж төлөөлөн оролцож байна.
Монгол Улсын төлөөлөгчдийг Монгол Улсын Шадар сайд, Эдийн засаг, хөгжлийн сайд Н.Учрал ахалж, УИХ-ын гишүүд, Хууль зүйн байнгын хорооны дарга Д.Цогтбаатар, Монгол Улсаас Хөх хотноо суугаа Ерөнхий консул, төлөөлөгчид болон аймгийн Засаг дарга нар оролцов.
Соёлын салбараас Монгол Улсын Дуурь, Бүжгийн Эрдмийн Театрын удирдлага, уран бүтээлчид, Монгол Улсын Филармони, Морин хуурын найрал хөгжим үндэсний болон сонгодог бүтээлийн дээжсээс сорчлон “Найрамдлын солонго” хамтарсан уран бүтээлийн тоглолтуудыг толилуулав. Мөн Беларусын театрын уран бүтээлчид урилгаар оролцсон нь энэ удаагийн арга хэмжээний хүрээг улам өргөжүүллээ.
Энэхүү хамтарсан тоглолт нь Монгол, Хятад хоёр улсын соёлын солилцоог өргөжүүлэх, үндэсний урлаг, өв уламжлалыг олон улсын түвшинд сурталчлан таниулах, уран сайхны илэрхийллийг олон талаас өвөрмөц хэв маягаар харуулах зэрэг чухал ач холбогдолтой юм.
