Олимпын музей “On Location”-той хамтын ажиллагаагаа шинэчилж байгаагаа зарлалаа. “On Location” нь “Милано-Кортина 2026” олимп, паралимпын өвлийн наадам болон “Лос Анжелес 2028” олимпын наадмын албан ёсны зочлох үйлчилгээний түнш байгууллага юм.
Энэхүү хамтын ажиллагааны хүрээнд Олимпын музей түүхэн үнэт дурсгалуудаа зээлдүүлэхээс гадна олимпын өв, соёл, урлаг, спорт, энтертайнментийг нэгтгэсэн өвөрмөц үзвэрийн аяллыг бий болгож, Милан хотод олимпын сэдэвт үзэсгэлэн, хөтөлбөрүүдийг хамтран зохион байгуулах юм. Энэхүү тансаг зочлох үйлчилгээний төв нь хотын төвд спортын арга хэмжээний дундуур амрах орчин, дэлхийн түвшний хоол ундаа болон Олимпын баярыг үргэлжлүүлэн тэмдэглэх интерактив үзмэрүүдийг санал болгоно.
Олимпын бусад үнэт дурсгалуудыг “Clubhouse 26 Cortina”, “Clubhouse 26 Livigno” болон сонгогдсон спортын цэнгэлдэх хүрээлэн дэх VIP үйлчилгээний талбайд байрлуулна. Зочлох үйлчилгээний багцыг зөвхөн hospitality.milanocortina2026.org сайтаар авах боломжтой.
“Милано-Кортина 2026”-ийн дээд түвшний зочлох үйлчилгээ болон Олимпын музейн соёлын арга хэмжээ зохион байгуулах туршлага хослон үнэхээр өвөрмөц үйлчилгээ бий болголоо” хэмээн Олимпын музейн захирал Анжелита Тео онцлов.
“Бид Олимпын музейтэй дахин хамтран ажиллаж, хүлээлтээс давсан зочлох үйлчилгээ үзүүлэх болсонд баяртай байна” хэмээн “On Location”-ы Олимп, Паралимпын наадам хариуцсан гүйцэтгэх дэд ерөнхийлөгч Уилл Уистон мэдэгдэв.
Энэ нь Олимпын музейн хувьд хоёр дахь удаагаа Олимпын зочлох үйлчилгээний хөтөлбөрт оролцож буй тохиолдол юм. Тус музей “Парис 2024” олимпын наадамд “Clubhouse 24” концепцыг хэрэгжүүлж, урлаг, соёлын өвөрмөц орон зайг зочлох үйлчилгээний төв болгон ашигласнаар олон улсын “Bea World Award”-ын “Unexpected use of a space” ангилалд шагнал хүртэж байсан билээ.
Парист анх удаа олимпын зочлох үйлчилгээний хөтөлбөрт урлаг, соёлын элементүүдийг гүнзгий шингээж, Олимпын медаль, бамбарын иж бүрдэл, “Olympism Made Visible” болон “Olympian Artists” хөтөлбөрийн бүтээлүүд зэрэг үнэт үзмэрүүдийг үзүүлэн, үзэсгэлэнгийн зохион байгуулалт, дизайн, түүх өгүүлэлтийн мэргэжлийн арга барилаараа ялгарч байв.
Олимпын музейн тухай
Олимпын музей нь дэлхийд хамгийн том, цогц олимпын өвийн албан ёсны төв бөгөөд түүхэн дурсгал, архив, зураг, ном, кино зэргийг хадгалдаг. Швейцарийн Лозанн хотод байрлах тус музей олон улсын үзэсгэлэн, боловсролын хөтөлбөрөөр дамжуулан олимпын спортын түүх, урлаг, соёлын олон талт түүхийг түгээдэг.
Олимпын үнэт зүйлс болох хүндэтгэл, нөхөрлөл, шилдэг байх, эв нэгдлийн үзэл санааг түгээн, тамирчид, жуулчид, оюутан, уран бүтээлчид болон дэлхий даяарх музейн сүлжээг холбож өгдөг. Дэлгэрэнгүй мэдээллийг olympics.com/museum сайтаас авна уу.
On Location компанийн тухай
“On Location” нь спорт, урлаг, соёлын томоохон арга хэмжээнд албан ёсны эрх бүхий, дээд түвшний зочлох үйлчилгээ, тасалбар, аялал, үзэгчийн туршлага санал болгодог дэлхийн тэргүүлэгч байгууллага юм. Олимп, Паралимпын наадам, FIFA World Cup 2026™, Super Bowl, NCAA Final Four зэрэг олон улсын томоохон арга хэмжээнд албан ёсны түнш болон үйлчилгээ үзүүлдэг байгууллага билээ.
