Хүн төрхт робот технологийн зах зээл энэ онд эрчимтэй тэлж, хөрөнгө оруулагчдын анхаарлыг татаж байна. Түүнчлэн тус технологи нь “ChatGPT” зэрэг генератив хиймэл оюунтай адил богино хугацаанд огцом өсөлт үзүүлэх төлөвтэй байгааг шинжээчид онцолж байна.
Энэ тухай салбарын мэргэжилтэн Сюн Ёужүн “Манай салбарын хэмжээнд ‘хүн төрхт роботын ChatGPT агшин’ хэдийнэ ирсэн гэх нэгдсэн ойлголт бий” хэмээн Сингапурт болсон үйл ажиллагааны үеэр онцолжээ. Мөн тэрбээр “2024 он бол хүн төрхт роботыг олноор үйлдвэрлэх жил байсан” гэдгийг тодорхойлж, тус роботын биеийн механик бүтэц болон хиймэл оюунд суурилсан тархины хувьд маш хурдацтай ахиц гарсныг нэмж хэлсэн юм.
Хүн төрхт роботын зах зээлийн өрсөлдөөн ширүүсэж, “Tesla” компанийн Optimus роботоос эхлүүлээд Хятадын “Unitree”, “Galbot”, “Agibot” болон “UBTech” зэрэг стартап компани бүтээгдэхүүнээ танилцуулж эхэлжээ. Хэдийгээр хүн төрхт роботын хэрэглээ генератив хиймэл оюуны түвшинд хүрээгүй боловч ойрын жилүүдэд дэлхийн эдийн засагт томоохон өөрчлөлт авчирна гэж шинжээчид үзэж байна.
Гэвч урт хугацааны үйлдвэрлэлийн мөчлөг болон үйлдвэрлэлийн өндөр зардал нь генератив хиймэл оюунтай харьцуулахад нийлүүлэлтэд сөргөөр нөлөөлж болзошгүй юм. Мөн тус салбарт ёс зүй болон хууль эрхзүйн асуудал зэрэг сорилт тулгарч байна. “Bank of America Merrill Lynch”-ийн тооцоогоор, дэлхийн нийт хүн төрхт роботын нийлүүлэлт энэ онд 18,000-д хүрэх бол, 2060 он гэхэд дэлхий даяар нийт роботын тоо 3 тэрбумд хүрэх төлөвтэй байна.
Эх сурвалж: CNBC
