Нийслэлчүүд өнгөрсөн гуравдугаар сард гэрэл зурагчин А.Түмэнжаргалын гэрэл зургаар дамжуулан Төвд орноор аялсан билээ. Тэрбээр Төвдийн тухай гэрэл зургийн үзэсгэлэнгээ Уран зургийн галлерейд гурван өдрийн турш дэлгэсэн юм. Энэхүү үзэсгэлэнгээрээ Төвдөөр хийсэн аяллынхаа болон Монголын үзэсгэлэнт байгаль, аж байдлын тухай 100 шилдэг гэрэл зургийг дэлгэн харуулсан.
Харин энэхүү гэрэл зургийн үзэсгэлэнгээ үзэгчдийн хүсэлтээр худалдаа хэлбэрээр нэмж баяжуулан “BlueMon” цамхагт энэ сарын 7-ноос 17-ны хооронд толилуулахаар болжээ. Энэ удаагийнх нь Монголын тухай зураг түлхүү орж байгаагаараа онцлогтой гэнэ. Мэргэжлийн гэрэл зурагчид болон сонирхогчдын дунд Alеx нэрээр танил болсон А.Түмэнжаргал БНХАУ-ын Тенжин хотод хоёр удаа үзэсгэлэнгээ гаргаж, “Wonders of Mongolia”, “Inspiring Mongolia”, “Savage garden”, “Ариун орноор Төвд” нийт дөрвөн зургийн цомог эрхлэн гаргасан уран бүтээлч юм.
