АНУ-ын технологийн гигант “Meta” компани өсвөр насныхны дунд түгээмэл хэрэглэгддэг Instagram нийгмийн сүлжээнд шинэ төрлийн аюулгүйн стандарт хэрэгжүүлж эхэллээ.
Тус бодлого нь 13-17 насны хэрэглэгчдийг насанд хүрэгчдэд зориулагдсан контент болон хаяг, холбоостой нийтлэлээс хамгаалахад чиглэж буй. Шинэ журамд PG-13 зэрэглэлтэй хязгаарлалт багтсан нь контентын бодлогын хүрээг дахин тодорхойлсон алхам байлаа.
Өсвөр насныхны сэтгэцийн эрүүл мэнд болон онлайн орчин дахь аюулгүй байдлын талаарх шүүмжлэл эрчимжиж, эцэг эхчүүдийн зүгээс технологийн компаниудыг хяналтаа чангатгахыг шаардаж байгаа нь дээрх шийдвэрт голлон нөлөөлжээ.
Шинэ журмын дагуу өсвөр насны хэрэглэгчид “OnlyFans” зэрэг насанд хүрэгчдэд чиглэсэн платформын нэр дурдсан контент болон хуудаснаас автоматаар тусгаарлагдах юм.
Мөн хараалын үгс агуулсан контент өсвөр насныханд санал болгохгүй байх тусгай алгоритм хэрэгжиж эхэлжээ.
