Эдит Джованна Гассион 1915 оны энэ өдөр буюу арванхоёрдугаар сарын 19-нд Францын Парис хотод төржээ.
Түүний ээж гудамжны дуучин, аав нь акробатчин байв. Зав зайгүй эцэг эх нь охиныг хамаатнууд дээрээ орхидог, эсвэл эмээгийнх нь эрхэлдэг зочид буудалд үлдээдэг байжээ.
Эдит өсвөр наснаасаа гадаа гудамжинд дуулж эхэлжээ. Маш хүчтэй хоолой, дуулах байдал нь түүнийг гудамжны бусад дуучдаас илт ялгаруулж байв.
1935 онд Эдитийг кабарегийн эзэн Луи Лепле анзаарч, түүнд Пиаф (Болжмор) нэр өгсөн байна. Учир нь Эдит жижигхэн, туранхай охин байлаа. Луи түүнд тайзан дээр гарах боломж олгосон. Удалгүй охины тухай Парис хот тэр чигээрээ ярьж эхэлсэн юм.
1930-аад оны сүүлээр Пиаф Францын том тайзнууд дээр дуулдаг, пянз гаргасан, алдартай дуучин болоод байв. Дэлхийн хоёрдугаар дайны үеэр ч дуулсаар, дайны дараа АНУ, Европт аялан тоглолт хийж байлаа.
“Би бүгдийн төлөө дуулдаггүй, би хүн бүрийн төлөө дуулдаг” гэж ярьдаг байлаа.
Түүний хувийн амьдрал тун эмгэнэлтэй. Алдарт боксчин, дэлхийн аварга Марсель Сердантай бараг гэрлэх шахсан гэдэг. 1949 онд Сердан Нью-Йорк руу аялан тоглолт хийж байсан Пиафтай уулзахаар Атлантын далай дээгүүр нисэж яваад осолдож, амиа алдсан юм.
Хоёр ч удаа машины осолд орж, өвчин намдаагч хэрэглэсээр хамааралтай болж, эрүүл мэнд нь ихэд доройтов.
Эдит үхлээс айдаггүй гэдгээ хэлдэг байлаа. “Надад ингэж амьдрах боломж олгосон Бурхандаа баярлалаа. Би 100 хувь амьдарсан, хэзээ ч харамсаж байгаагүй” гэж ярьж байлаа.
Пиаф 1963 оны аравдугаар сарын 10-нд 47 настайдаа Бурханы орныг зорьсон юм.
