К-попын супер од BTS хамтлаг дөрвөн жил завсарласны дараа тайзнаа эргэн ирж буйгаа зарлан, дэлхийг хамарсан томоохон аялан тоглолт хийнэ гэдгээ албан ёсоор танилцуулсан. Нийт 79 удаагийн, Лондон, Токио, Мюнхен, Сидней, Лос-Анжелес зэрэг хотууд багтсан энэхүү аялан тоглолт нь энэ оны хамгийн томоохон хөгжмийн үйл явдлуудын нэг болох төлөвтэй байна. Учир нь тус хамтлаг 2019 оноос хойш АНУ, Өмнөд Солонгосоос өөр оронд тоглолт хийгээгүй юм.
Тэдний өмнөх аялан тоглолт к-поп хамтлагийн хувьд дээд амжилт тогтоож, дэлхий даяар ойролцоогоор 246 сая ам.долларын тасалбарын орлого олж байв. Мөн BTS нь Уэмбли цэнгэлдэх хүрээлэнд тоглосон анхны Өмнөд Солонгос уран бүтээлч болсон билээ.
Шинэ аялан тоглолт 2026 оны дөрөвдүгээр сарын 9-нд Өмнөд Солонгосын Гоянг цэнгэлдэх хүрээлэнд гурван үдшийн тоглолтоор эхэлж, улмаар Ази, Европ, Америк тивүүдээр үргэлжилнэ.
Тоглолтууд 360 градус, дугуй хэлбэрийн тайзнаа явагдах бөгөөд ингэснээр бүх цэнгэлдэхэд илүү олон суудал гаргах боломжтой ажээ.
Тэд Лондонд долдугаар сарын 6, 7-нд Тоттенхэм Хотспур цэнгэлдэх хүрээлэнд хоёр үдшийн тоглолт хийх юм. Европын хэсэгт Парис, Мадрид, Брюссель, Мюнхен хотууд мөн багтжээ.
Хамтлагийн албан ёсны цахим хуудсанд мэдээлснээр 2027 онд Япон, Ойрх Дорнод болон “бусад бүс нутагт” нэмэлт тоглолтууд зарлагдана гэжээ.
Фэнүүдэд зориулсан тасалбарын худалдаа нэгдүгээр сарын 22-нд эхлэх бол олон нийтэд хоёр хоногийн дараа нээлттэй болно.
“Billboard” сэтгүүлийн мэдээлснээр BTS болон тэдний харьяа “BigHit/Hybe” компани энэхүү эргэн нэгдэлтээс (тоглолт, бараа бүтээгдэхүүн, лиценз, цомог борлуулалт, стриминг орлого зэргээс) нийтдээ нэг тэрбум ам.доллароос давсан ашиг олох боломжтой гэж үзжээ.
