Лос Анжелес хотын “Crypto.com” аренад хөгжмийн ертөнцийн шилдгүүдийг тодруулах 68 дахь удаагийн “Грэмми” шагнал гардуулах ёслол боллоо.
Энэ удаагийн “Грэмми”-гийн шагнал гардуулах ёслолд реппер Кендрик Ламар хамгийн олон төрөл буюу 9 төрөлд нэр дэвшжээ. Түүний араас Лэди Гага, Жек Антонофф, Cirkut нар тус бүр 7 төрөлд, Bad Bunny, Сабрина Карпентер, Сербан Генеа, Леон Томас нар тус бүр 6 төрөлд нэр дэвшсэн байна.
2025 оны зун нээлтээ хийж, Netflix стриминг үйлчилгээний хамгийн олон үзэлттэй киногоор тодорсон “KPop Demon Hunters” хүүхэлдэйн кинон дээр гардаг Huntr/x охидын хамтлагийн дуулсан “Golden” дуу Визуал контентын Шилдэг дууны төрөлд ялагчаар тодорч, Грэммигийн шагнал хүртсэн анхны к-поп дуу болжээ.
Өнгөрсөн 8 дугаар сард “Golden” Billboard Hot 100 чартыг тэргүүлж, 1 дүгээр сарын эхээр болсон “Golden Globes” шагнал гардуулах ёслолоос Шилдэг дууны шагналыг хүртсэн билээ. Түүнээс гадна Ejae, Одри Нуна, Рей Ами нарын дуулсан эл бүтээл 2026 оны Оскарын шагнал гардуулах ёслолд нэр дэвшсэн анхны к-поп дуу болоод байгаа юм.
