Завхан аймгийн музейн угсаатны зүйн танхимд 110 гаруй жилийн өмнө бүтээсэн сэлэм, цахиур буу гэх мэт 10 орчим үзмэрийг үзэгчдэд дэлгэн үзүүлж байна.
Үүний нэг нь Хатанбаатар Магсаржавын хэрэглэж байсан сэлэм юм. Уг сэлмийг 1916 онд нэр нь тодорхойгүй уран дархан төмрөөр хийж, гуулин хамгаалалттай болгожээ.
Сэлэм, хутганы бариулыг олсоор ороож урласан бөгөөд гуулин хамгаалалтыг угалзан хээгээр битүү хээлсэн байна. Энэхүү сэлмийг Хатанбаатар Магсаржав Улиастайд амьдарч байхдаа хэрэглэж байжээ.
1920-оод оны үед монгол дархан хийсэн зэс малгайт цахиур буу угсаатны зүйн танхимын гол үзмэрүүдийн нэг юм.
Энэхүү бууг Хатанбаатар Магсаржавын цэрэг Завхан аймгийн Алдархаан сумын партизан О.Дулам хэрэглэж байжээ. 1970 онд үзмэр цуглуулгаар музейн сан хөмрөгийн хамгаалалтад авсан байна. Эх биедээ үүрэх оосрын нүхтэй, хар төмөр буюу гуулиар бөгжилж бэхэлгээ хийсэн цахиур буу юм.
