“Ану хатан” киногоороо шуугиан тарьсан “Шүүдэр” продакшны 2 дарь бүтээл, үзэгчдийн дунд хүлээлт үүсгэсэн содон сэдэвт кино “Улаан пальто” трэйлерээ дэлгэж байна. Эх үрсийн баярын босгон дээр 5-р сарын 21-нд нээлтээ хийх “Улаан пальто”-г уран бүтээлчид нь гэр бүлээрээ үзэх кино хэмээн тодорхойлж буй.
Сүүлийн үед хамгийн эрэлттэй, үнэтэй эмэгтэй жүжигчнээр тодроод буй МУСТА О.Долгор, “Байгаль beauty”-ийн захирал, жүжигчин О.Байгаль, хөтлөгч, жүжигчин Т.Өөдөө нарын чадварлаг, сайхан бүсгүйчүүдийг нэгэн уран бүтээлд нэгтгэснээрээ, хүний урьд насны амьдрал, эх үрийн нандин холбоо, хүүхдийн гэгээн ертөнцийн тухай сэдвийг хөндсөнөөрөө “Улаан пальто” анхаарал татаж байна.
Зохиолч Б.Шүүдэрцэцэгийн “Улаан пальто” өгүүллэгээс сэдэвлэн бүтээж буй энэ кино үзэгчдийн сэтгэлд хоногшсон “Мартагдсан дууль” шиг Номин хэмээх бяцхан охины дотоод ертөнцийг, хүнлэг сайхан сэтгэлийг, эгэл амьдралд тохиох нэгэн ер бусын түүхийг хөндсөнөөрөө уншигчдын сонирхлыг соронздон татдаг зохиолуудын нэг ажээ. Зураглаачаар МУСТА С.Баттулга ажиллаж, хөгжмийг нь МУСТА гитарчин Өөжгий бичиж, залуу найруулагч Э.Чинзориг найруулсан энэ бүтээл монгол кино санд нэгэн шинэ сэдэв, өвөрмөц өнгө нэмэх содон уран бүтээл болно хэмээн үзэгчид хүлээж байгаа билээ.
www.URLAG.mn
