Монгол Улсаас Канад Улсад суугаа Элчин сайд Э.Сарантогос Гатино хотод энэ сарын 21-нд болсон номын баярын үеэр “Улаанбаатарын өвлийн уянга” номын зохиогч Канадын сэтгүүлч Жан-Фредерик Легаре-Тремблед баяр хүргэж, уран бүтээлийн амжилт хүсэв.
Зохиогч уг номдоо Монгол орон, монголын соёлтой танилцсан гайхамшигтай мөчүүдээ дүрсэлсний зэрэгцээ Улаанбаатарын дүн өвөл уйтгарлан суухдаа сэтгэл зүрхнийхээ гүн рүү өнгийсөн мэдрэмж, бодол, эргэцүүллээ бичсэнээ энэ үеэр танилцуулав.
Монреаль, Квэбэк хотод энэ оны нэгдүгээр сарын 21, 22-нд болсон номын нээлтэд мөн хотод ажиллаж амьдарч буй монгол иргэд хүрэлцэн очиж, зохиогчтой халуун дотно яриа өрнүүлсэн байна.
Жан-Фредерик Легаре-Трембле нь Монреалийн их сургуульд ажилладаг. “Le Devoir” сонин, “L’actualité” сэтгүүл, Radio-Canada, Олон улс судлалын төв CÉRIUM-д ажиллаж байсан туршлагатай, олон улсын сэтгүүл зүйн Квэбэкийн санг үүсгэн байгуулагчдын нэг гэж тус улсад суугаа ЭСЯ-наас мэдээллээ.
