R&B болон хип-хоп соул урсгалын нэрт дуучин Мэри Ж.Блайж хөгжмийн бүтээлүүдийнхээ каталогтой холбоотойгоор “Primary Wave Music” компанитай хамтын ажиллагааны гэрээ байгуулжээ. Уг тохиролцоонд түүний дууны зохиогчийн бүтээлүүд болон дуу бичлэгүүд багтаж байгаа талаар тус компани 2026 оны аравдугаар сарын 26-нд мэдэгдсэн байна.
“Хип-хоп соулын хатан хаан” хэмээн алдаршсан Блайжийн уран бүтээлийн каталогт “Family Affair”, “My Life”, “Mary Jane (All Night Long)”, “You Bring Me Joy”, “Be Happy”, “Be Without You”, “I Can Love You” зэрэг олон хит дуу багтдаг. Эдгээр бүтээл нь шинэ гэрээний хүрээнд хамрагдах ажээ.
Хамтын ажиллагааны хүрээнд Блайж болон түүний баг “Primary Wave”-ийн хөгжмийн хэвлэлийн болон маркетингийн дэд бүтцийг ашиглах боломжтой болно. Талууд цаашид хөгжмийн сурталчилгаа, брэнд хөгжүүлэлт, дижитал маркетинг болон дууг кино, телевизийн бүтээлд ашиглуулах зэрэг чиглэлээр хамтран ажиллахаар төлөвлөж байна.
Гэрээний санхүүгийн нөхцөл болон хөгжмийн эрхийн хэдэн хувийг шилжүүлсэн талаар дэлгэрэнгүй мэдээлэл нийтэд ил болоогүй байна. Иймээс дуучин бүх хөгжмийн каталогийнхоо эрхийг бүрэн худалдсан гэж үзэх боломжгүй юм.
Мэри Ж.Блайж 1992 онд “What’s the 411?” анхны цомгоо гаргаснаар хөгжмийн карьераа эхлүүлж байв. Түүнээс хойш 15 студийн цомог, хоёр амьд тоглолтын цомог, олон арван сингл гаргаж, дэлхий даяар 50 сая гаруй пянз, цомог борлуулсан гэж “Primary Wave” мэдээлжээ.
Тэрбээр карьерынхаа хугацаанд “Грэмми”-ийн есөн шагнал хүртэж, 37 удаа нэр дэвшсэн бөгөөд 2024 онд Рок-н-роллын алдрын танхимд багтсан юм. Мөн 2018 онд Холливудын алдрын гудамжинд өөрийн одтой болсон байна.
