Найруулагч Пүрэв-Очирын Лхагвадуламын “Урагшаа харсан цонх” (A South Facing Window) богино хэмжээний кино Финландын Тампере хотод болсон Tampere Film Festival-ийн олон улсын уралдаант хэсгээс “Шилдэг уран сайхны кино” (Best Fiction) шагнал хүртжээ.
Тус бүтээлийг Монголын “Гуру Медиа” болон Францын “Аврора Филмс” компани хамтран бүтээсэн байна. Кино нь харилцаа нь хөндийрсөн залуу хос бие биенээ ойлгож, амьдралын бэрхшээлийг даван туулахыг оролдож буйг энгийн, даруу өгүүлэмжээр харуулсан бүтээл юм. Гол дүрүүдэд Мөнхбатын Аззаяа, Мөнхнасангийн Алтаншагай нар тоглосон.
“Урагшаа харсан цонх” кино өмнө нь Францын “Prix Unifrance du court-métrage” наадмаас Тусгай шүүгчдийн шагнал, “Locarno Film Festival”-ээс Pardo Verde: Special Mention шагнал хүртэж байв.
1969 оноос зохион байгуулж буй “Tampere Film Festival” нь Европын нэр хүндтэй богино хэмжээний кино наадмуудын нэг бөгөөд Оскар, BAFTA, Европын кино академийн шагналд нэр дэвших эрх олгодог шалгуур наадамд тооцогддог.
