2014 онд ОХУ-ын Санкт-Петербург хотын Театр урлагийн академийг төгссөн нэг ангийн нөхөд эргэн нэгдэж, өөрсдийн театрыг байгуулсан нь өнөөдрийн “Про” театр. Ерөнхийлбөл жүжигчид, нарийвчилбал хүүхэлдэйн театрын жүжигчнээр мэргэшсэн залуус. Тиймээс тэд драмын, сонгодог жүжгүүдээс гадна хүүхдийн жүжигт төвлөрөн ажилладаг. Тус театрын жүжигчин Э.Буд-Эрдэнэтэй театрын урлагт шимтэгсэд “Про” театрын бүтээл, Францын алдарт зохиолч Виктор Хюгогийн “Инээмтгий хүн” романаас сэдэвлэсэн ижил нэрт визуал драмын жүжгийн Жозианна, Эрнст Теодор Амадей Гофманий “Цөмөөхэй ба хулганын хаан” үлгэрээс сэдэвлэсэн “Цөмөгч цэрэг ба хулганы хаан” хүүхдийн жүжгийн Мари охин, Александр Вампиловын алдарт “Нугасны ан” жүжгийн зохиолоос сэдэвлэсэн “Сүүлчийн бороо” мета драмын жүжгийн Вера зэрэг дүрүүдээр “дотно танилцсан” гэхэд хилсдэхгүй.
Тэрбээр хамгийн сүүлд Андрей Ивановын “Это все она” зохиолоос сэдэвлэсэн “Түүний буруу” орчин үеийн сэтгэл зүйн драмын жүжгийн гол дүр Татьянад хувирч үзэгчидтэй “уулзсан” юм.
Авьяаслаг, адтай уран бүтээлчид төрсөн өдрийн мэнд хүргэе!
