2000-гаад оны эхээр цэнхэр дэлгэцээр гарч, Солонгос соёлын давалгааг (Hallyu) Монголд эхлүүлсэн хамгийн анхны кинонуудын нэг бол “Зочид буудлын эзэн” (Hotelier) юм. Энэ олон ангит кино 2001 онд Өмнөд Солонгосын MBC телевизээр цацагдсан бөгөөд Солонгосын олон ангит киноны “алтан үе”-ийн сор болсон бүтээлүүдийн нэг.
Тэгвэд нийт 20 ангитай, тансаг зэрэглэлийн зочид буудлын менежмент, бизнесийн өрсөлдөөн болон ээдрээтэй хайр дурлалын харилцааг маш сонирхолтойгоор харуулдаг энэхүү олон ангит кино дахин үзэгчдийн хүртээл болж эхэллээ. Тодруулбал, “Зочид буудлын эзэн” олон ангит кино өчигдөр /2026.06.05/-өөс “Asianbox” сувгаар гарч эхэлжээ.
30 жилийн түүхтэй, нэр хүндтэй “Сөүл зочид буудал”-ын захирал гэнэт зүрхний шигдээсээр нас барснаар зочид буудалд санхүүгийн болон удирдлагын хямрал нүүрлэнэ. Талийгаач захирлын эхнэр буудлаа авч үлдэхийн тулд тэмцэх бөгөөд нөгөө талд нь уг зочид буудлыг өөрийн болгохоор улайрч буй өрсөлдөгч компани гарч ирдэг. Өрсөлдөгч тал зочид буудлыг хүчээр худалдаж авах (M&A) ажлыг гүйцэтгүүлэхээр Америкт боловсрол эзэмшсэн, хүйтэн хөндий, чадварлаг мэргэжилтэн Шин Дун Хёг-ийг хөлсөлснөөр гол тэмцэл эхэлнэ.
Шин Дун Хёг (Жүжигчин: Бэ Ён Жүн / Bae Yong-joon): Америкт өссөн, зочид буудал худалдан авах чиглэлээр мэргэшсэн олон улсын зуучлагч. Тэрээр “Сөүл зочид буудал”-ыг унагах даалгавартай ирсэн ч буудлын менежер бүсгүйд дурласнаар түүний төлөвлөгөө болон дотоод сэтгэл нь өөрчлөгддөг.
Со Жин Ён (Жүжигчин: Сон Юн А / Song Yoon-ah): “Сөүл зочид буудал”-ын үнэнч, тууштай, эрч хүчтэй менежер бүсгүй. Тэрээр буудлаа аврахын тулд хуучин хайртай залуугаа буцаан авчрахаар Америкийг зорьдог бөгөөд хожим нь Шин Дун Хёгтой хайр сэтгэлийн холбоотой болно.
Хан Тэ Жүн (Жүжигчин: Ким Сын Ү / Kim Seung-woo): Уг зочид буудлын ерөнхий менежер асан. Нэгэн таагүй хэргээс болоод ажилаа өгч Америкт амьдарч байсан ч Со Жин Ёны ятгалгаар буудлаа аврахаар эргэн ирж, Дун Хёгийн гол өрсөлдөгч болдог.
Ким Юн Хи (Жүжигчин: Сон Хе Кё / Song Hye-kyo): Зочид буудлыг худалдаж авахаар улайрч буй тэрбумтан эрийн тэрслүү охин. Эцгийнхээ дарамтаас зугтан “Сөүл зочид буудал”-д зөөгчөөр ажилд орох бөгөөд ерөнхий менежер Хан Тэ Жүнд ухаангүй дурлана.
